7 વર્ષ બાદ ભારતીય ધરતી પર મળશે મોદી અને જિનપિંગ, BRICS પહેલા થશે દ્વિપક્ષીય બેઠક

આગામી 12 અને 13 સપ્ટેમ્બરે નવી દિલ્હીના પ્રતિષ્ઠિત 'ભારત મંડપમ' ખાતે ૧૮મી બ્રિક્સ (BRICS) સમિટનું ભવ્ય આયોજન કરવામાં આવ્યું છે. આ મહત્વપૂર્ણ શિખર સંમેલનમાં ભાગ લેવા માટે ચીનના રાષ્ટ્રપતિ શી જિનપિંગ શનિવારે ભારત પહોંચે તેવી પ્રબળ શક્યતા છે. બેઇજિંગ સ્થિત ચીનના વિદેશ મંત્રાલય (MFA) દ્વારા આ મુલાકાત અંગે સત્તાવાર જાહેરાત કરવામાં આવે તેવી અપેક્ષા છે. આ મુલાકાત દરમિયાન શનિવારે સાંજે અંદાજે 6 વાગ્યે ભારત મંડપમ ખાતે વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગ વચ્ચે દ્વિપક્ષીય (બાયલેટરલ) બેઠક યોજાય તેવી સંભાવના છે.

BRICS પહેલા થશે દ્વિપક્ષીય બેઠક

આ મુલાકાત અને બેઠક ભારત અને ચીન વચ્ચેના રાજકીય સંબંધોની દ્રષ્ટિએ અત્યંત ઐતિહાસિક અને નિર્ણાયક સાબિત થઈ શકે છે. ખાસ ઉલ્લેખનીય બાબત એ છે કે વર્ષ ૨૦૨૦માં પૂર્વી લદ્દાખની ગલવાન ઘાટીમાં થયેલી હિંસક અથડામણ બાદ છેલ્લા ૭ વર્ષમાં ભારતીય ધરતી પર વડાપ્રધાન મોદી અને શી જિનપિંગ વચ્ચે આ પહેલી સીધી દ્વિપક્ષીય બેઠક હશે. અગાઉ ચીનના રાષ્ટ્રપતિ છેલ્લે ૧૧-૧૨ ઓક્ટોબર ૨૦૧૯ના રોજ ભારતની મુલાકાતે આવ્યા હતા, જ્યારે તેઓ તમિલનાડુના મહાબલીપુરમ (મામલ્લાપુરમ) ખાતે PM મોદી સાથે અનૌપચારિક સમિટમાં સામેલ થયા હતા.

ભાગીદાર દેશો અનેક મુદ્દાઓ પર કરશે ચર્ચા

ભારત આ વર્ષે બ્રિક્સ જૂથની અધ્યક્ષતા સંભાળી રહ્યું છે, અને આ સમિટની મુખ્ય થીમ "સ્થિતિસ્થાપકતા, નવીનતા, સહકાર અને સ્થિરતા માટેનું નિર્માણ" રાખવામાં આવી છે. ખાસ કરીને વર્ષ ૨૦૨૬માં બ્રિક્સની સ્થાપનાના ૨૦ વર્ષ પણ પૂર્ણ થઈ રહ્યા છે, જે આ સમિટને વધુ ખાસ બનાવે છે. આ બેઠકમાં સભ્ય અને ભાગીદાર દેશોના ટોચના નેતાઓ રાજકીય સુરક્ષા, આર્થિક-નાણાકીય સહયોગ તેમજ વૈશ્વિક અને પ્રાદેશિક મુદ્દાઓ પર ઊંડાણપૂર્વક ચર્ચા કરશે.

આ પણ વાંચોઃ Donald Trump ચૂંટણી જીતવાથી લઇને 2027 સુધીમાં બનશે આ ભયાનક ઘટનાઓ, ચીનના નાસ્ત્રેદમસની ભવિષ્ય વાણી!