Ahmedabadમાં ઓડિટ વગર ચાલતી ગ્રાન્ટેડ સ્કૂલો સામે શિક્ષણ વિભાગની લાલ આંખ, 129 સ્કૂલોને ફટકારી નોટિસ

અમદાવાદ શહેરમાં ઓડિટ કરાવ્યા વગર ચાલતી ગ્રાન્ટેડ (અનુદાનિત) શાળાઓ સામે જિલ્લા શિક્ષણ અધિકારી (DEO) દ્વારા કડક કાયદાકીય કાર્યવાહી હાથ ધરવામાં આવી છે. વર્ષ 2023-24નું હિસાબી ઓડિટ બાકી રાખનાર શહેરની 129 જેટલી ગ્રાન્ટેડ શાળાઓને કારણદર્શક નોટિસ ફટકારવામાં આવી છે. શિક્ષણ વિભાગ દ્વારા વારંવાર સૂચનાઓ આપવા છતાં ઓડિટની પ્રક્રિયા પૂર્ણ ન કરાતાં વહીવટી તંત્રે હવે આકરું વલણ અપનાવ્યું છે.

3 વખત આદેશ આપ્યા છતાં બેદરકારી

તંત્ર દ્વારા અગાઉ ત્રણ-ત્રણ વખત સ્પષ્ટ આદેશો અને યાદીઓ આપવા છતાં પણ સંબંધિત શાળા સંચાલકો દ્વારા ઓડિટ રિપોર્ટ રજૂ કરવામાં આવ્યો નથી. શાળાઓની આ ગંભીર બેદરકારીને ધ્યાને રાખીને શિક્ષણ વિભાગે 25 સપ્ટેમ્બર સુધીની આખરી મુદત (અલ્ટીમેટમ) આપી છે. આ સમયગાળા દરમિયાન તમામ હિસાબી ઓડિટ પૂર્ણ કરીને તેનો સત્તાવાર રિપોર્ટ જમા કરાવવો ફરજિયાત રહેશે.

સંચાલક મંડળની અંગત જવાબદારી નક્કી કરાશે

શિક્ષણ વિભાગે આ આદેશ સાથે સ્પષ્ટ ચેતવણી આપી છે કે જો 25 સપ્ટેમ્બર સુધીમાં ઓડિટની કામગીરી પૂર્ણ કરવામાં નહીં આવે તો કાયદેસરના કડક પગલાં ભરવામાં આવશે. આ સાથે જ, ઓડિટ ન થવાના કિસ્સામાં ઊભી થનારી તમામ વિષમ પરિસ્થિતિઓ અને પરિણામોની અંગત જવાબદારી શાળાના સંચાલક મંડળની રહેશે. આ કાર્યવાહીથી અમદાવાદના શિક્ષણ આલમમાં અને શાળા સંચાલકોમાં ભારે ફફડાટ વ્યાપી ગયો છે.

આ પણ વાંચો : Surat News : લોકોના સ્વાસ્થ્ય સાથે ખુલ્લેઆમ ચેડાં! રાંદેરના ઝેપ્ટો ગોડાઉનમાંથી એક્સપાયરી ડેટની છાસ અને બ્રેડ જપ્ત