Ahmedabad ક્રાઈમ બ્રાન્ચનો માસ્ટરસ્ટ્રોક: 2.38 કરોડની નકલી નોટો સાથે સુરતની ગેંગ ઝડપાઈ, AIનો કર્યો હતો ઉપયોગ

ગુજરાતની આર્થિક રાજધાની અમદાવાદમાં ક્રાઈમ બ્રાન્ચે નકલી નોટોના એક એવા મસમોટા રેકેટનો પર્દાફાશ કર્યો છે, જેની મોડસ ઓપરેન્ડી જોઈ પોલીસ પણ ચોંકી ઉઠી છે. અમરાઈવાડી વિસ્તારમાંથી એક સફેદ ફોર્ચ્યુનર કારમાં લઈ જવાતી 2.10 કરોડની નકલી નોટો ઝડપાયા બાદ, તપાસના તાર સુરત સુધી પહોંચ્યા હતા. પોલીસે આ મામલે એક મહિલા સહિત કુલ 7 આરોપીઓની ધરપકડ કરી છે.

ChatGPT અને AI ટૂલ્સનો ઉપયોગ

આ કેસમાં સૌથી ચોંકાવનારો ખુલાસો એ થયો છે કે આરોપીઓએ નકલી નોટોને અસલી જેવી જ દેખાડવા માટે ફોટો-એડિટિંગ સોફ્ટવેર અને ChatGPT જેવા આર્ટિફિશિયલ ઇન્ટેલિજન્સ (AI) પ્લેટફોર્મનો ઉપયોગ કર્યો હતો. નોટોની ડિઝાઇન, લેઆઉટ અને સિક્યોરિટી ફીચર્સને હાઇ-ટેક ડિજિટલ ટૂલ્સની મદદથી આબેહૂબ બનાવવાનો પ્રયાસ કરવામાં આવ્યો હતો.

ચાઇનીઝ કનેક્શન અને સુરતનું પ્રિન્ટિંગ યુનિટ

મુખ્ય આરોપી મુકેશ ઠુમ્મરના નેતૃત્વમાં સુરતના એક રહેણાંક વિસ્તારમાં આખું પ્રિન્ટિંગ યુનિટ ધમધમતું હતું. આરોપીઓએ ડિજિટલ પેમેન્ટ ગેટવે દ્વારા અલીબાબા જેવા પ્લેટફોર્મ પરથી ચીની સ્ત્રોતો પાસેથી સુરક્ષા થ્રેડ પેપર ("RBI" અને "ભારત" લખેલા) મેળવ્યા હતા. ક્રાઈમ બ્રાન્ચે સુરતમાં દરોડા પાડી પ્રિન્ટર, પેપર કટિંગ મશીન અને વધુ ₹28 લાખની નકલી નોટો જપ્ત કરી છે.

અર્થતંત્ર પર મોટો પ્રહાર ટળ્યો

આરોપીઓ છેલ્લા ચાર મહિનાથી આ નેટવર્ક ચલાવતા હતા. આટલી મોટી માત્રામાં ઉચ્ચ ગુણવત્તાવાળી નકલી નોટો બજારમાં ફરતી થાય તે પહેલા જ પોલીસે સપ્લાય ચેઇનને તોડી પાડી છે. પકડાયેલા આરોપીઓમાં મુકેશ ઠુમ્મર, અશોક માવાણી, રમેશ ભાલર, દિવ્યેશ રાણા, પ્રદિપ જોટાંગીયા, ભરત કાકડીયા અને એક મહિલાનો સમાવેશ થાય છે. હાલ DCB પોલીસ સ્ટેશનમાં ગુનો નોંધી આંતરરાષ્ટ્રીય જોડાણોની તપાસ હાથ ધરાઈ છે.