Ahmedabadના રખિયાલમાં MD ડ્રગ્સ સાથે એક યુવકની ધરપકડ; કાલુપુરથી માલ સપ્લાય કરનાર ફરાર

અમદાવાદ શહેરમાં નશાના કારોબાર સામે પોલીસે લાલ આંખ કરી છે, ત્યારે પૂર્વ વિસ્તારના રખિયાલમાંથી મેફેડ્રોન (MD) ડ્રગ્સ સાથે એક યુવકને ઝડપી પાડવામાં પોલીસને મોટી સફળતા મળી છે. રખિયાલ પોલીસની ટીમે બાતમીના આધારે વોચ ગોઠવીને આ યુવકને પ્રતિબંધિત નશીલા પદાર્થ સાથે રંગેહાથ દબોચી લીધો હતો. પ્રાથમિક પૂછપરછમાં સામે આવ્યું છે કે, પકડાયેલો યુવક પોતે ડ્રગ્સનો બંધાણી છે અને પોતાના નશાનો ખર્ચ કાઢવા તેમજ લત પૂરી કરવા માટે જ તે ડ્રગ્સની હેરાફેરીના આ કાળા કારોબારમાં કુરિયર અને પેડલર તરીકે ઝંપલાવી બેઠો હતો.

રૂ.12 હજારનું ડ્રગ્સ જપ્ત અને કાલુપુર કનેક્શન

પોલીસે પકડેલા આરોપી પાસેથી અંદાજે રૂ.12,000ની બજાર કિંમત ધરાવતું 4.200 ગ્રામ એમડી ડ્રગ્સનો જથ્થો કબ્જે કર્યો છે. આરોપીની કડક પૂછપરછ દરમિયાન ડ્રગ્સના સોર્સ અંગે મોટો ખુલાસો થયો છે. પકડાયેલા યુવકે કબૂલાત કરી છે કે, તે આ નશાનો જથ્થો કાલુપુર રેલ્વે સ્ટેશન પાસે આવતા એક અજાણ્યા શખ્સ પાસેથી ખરીદીને લાવતો હતો. પોતે નશો કરવા માટે અને આસપાસના અન્ય બંધાણીઓને ઊંચા ભાવે છૂટક વેચાણ કરીને કમાણી કરવાના ઈરાદે તે આ માલ લાવ્યો હોવાનું બહાર આવ્યું છે.

રખિયાલ પોલીસે મુખ્ય સપ્લાયરની શોધખોળ શરૂ કરી

રખિયાલ પોલીસે એનડીપીએસ (NDPS) એક્ટની વિવિધ કલમો હેઠળ ગુનો નોંધીને ડ્રગ્સ સાથે પકડાયેલા આ આરોપીની વિધિવત ધરપકડ કરી લીધી છે. આ ગુનામાં કાલુપુર રેલ્વે સ્ટેશન વિસ્તારમાંથી ડ્રગ્સની ડિલિવરી આપનાર મુખ્ય સપ્લાયર હાલ પોલીસ પકડથી દૂર હોવાથી તેને ફરાર જાહેર કરવામાં આવ્યો છે. રખિયાલ પોલીસ અને સ્થાનિક ડિટેક્શન સ્ટાફ દ્વારા ટેકનિકલ સર્વેલન્સ અને કાલુપુર રેલ્વે સ્ટેશન આસપાસના સીસીટીવી ફૂટેજના આધારે તે અજાણ્યા સપ્લાયરને ઝડપી પાડવા માટે ચક્રો ગતિમાન કરવામાં આવ્યા છે.

ગુજરાતના વધુ સમાચાર વાંચવા માટે ક્લિક કરો