Ahmedabad News : ડીસામાંથી રૂ.16.20 લાખનું હેરોઇન પકડાયું! ડ્રગ્સ સપ્લાયર ‘બલ્લો’ ઠાકોર ANTF ના શિકંજામાં

ગુજરાતમાં નશાકારક પદાર્થોના દૂષણને નાથવા માટે એન્ટી નાર્કોટિક્સ ટાસ્ક ફોર્સ (ANTF) દ્વારા આકરી ઝુંબેશ ચલાવવામાં આવી રહી છે. જેના ભાગરૂપે ANTF ની ટીમે સફળ દરોડો પાડીને ઉત્તર ગુજરાતના ડીસામાંથી રૂ.16.20 લાખની બજાર કિંમતનું 81 ગ્રામ હેરોઇનનો જથ્થો કબજે કર્યો છે. રાજ્યમાં ગેરકાયદેસર ડ્રગ્સના કાળા કારોબારને ડામવા માટે હાથ ધરાયેલી આ કડક કાર્યવાહીથી નશાનો વેપાર કરતા તત્વોમાં ભારે ધ્રાસકો પડ્યો છે.

મુખ્ય સપ્લાયર મહેશ ઉર્ફે બલ્લો ઠાકોરની ધરપકડ

બનાવની પ્રાપ્ત વિગતો અનુસાર, ANTF ની ટીમને ચોક્કસ બાતમી મળી હતી કે ડીસા વિસ્તારમાં હેરોઇન જેવા ઘાતક નશાકારક પદાર્થનો જથ્થો સપ્લાય કરવામાં આવી રહ્યો છે. મળેલી બાતમીના આધારે ANTF ની ટીમે દરોડો પાડીને 81 ગ્રામ શુદ્ધ હેરોઇન સાથે મુખ્ય સપ્લાયર મહેશ ઉર્ફે બલ્લો ઠાકોરની સ્થળ પરથી જ અટકાયત કરી લીધી હતી. આરોપી લાંબા સમયથી સ્થાનિક વિસ્તારમાં નશાકારક પદાર્થોનું નેટવર્ક ચલાવતો હોવાનું પ્રાથમિક તપાસમાં બહાર આવ્યું છે.

ANTF એ ગુનો નોંધી તપાસ તેજ કરી

જપ્ત કરાયેલા હેરોઇનના જથ્થા સાથે આરોપી ઝડપાઈ જતાં ANTF દ્વારા આ અંગે કાયદેસરનો ગુનો દાખલ કરીને આગળની ધોરણસરની તપાસ શરૂ કરવામાં આવી છે. પકડેલા આરોપી મહેશ ઉર્ફે બલ્લો ઠાકોર આ હેરોઇનનો જથ્થો ક્યાંથી લાવ્યો હતો અને આગળ કોને સપ્લાય કરવાનો હતો તે દિશામાં ANTF દ્વારા સઘન પૂછપરછ હાથ ધરવામાં આવી રહી છે. આ ડ્રગ્સ સિન્ડિકેટ સાથે જોડાયેલા અન્ય તત્વો અને મુખ્ય આકાઓ સુધી પહોંચવા માટે પોલીસે તપાસના ચક્રો ગતિમાન કર્યા છે.

આ પણ વાંચો : Heroin Worth ₹16.20 Lakh Seized Near Deesa; ANTF Arrests Key Supplier