Ambajiમાં દાંતા તાલુકા પંચાયતના નવા ભવનનું ખાતમુહૂર્ત, રૂ.5 કરોડથી વધુના ખર્ચે બનશે અત્યાધુનિક કચેરી

અંબાજી નજીક આવેલા દાંતા ખાતે તાલુકા પંચાયત કચેરીના નવીન મકાનનું ભવ્ય ખાતમુહૂર્ત સંપન્ન થયું છે. અંદાજે રૂ. 5 કરોડથી પણ વધુના ખર્ચે નિર્માણ પામનારી આ અત્યાધુનિક અને સુસજ્જ કચેરી દાંતા વિસ્તારના નાગરિકો માટે વહીવટી સેવાઓ વધુ સરળ બનાવશે. પ્રશાસન અને નેતાઓ દ્વારા આગામી માત્ર એક જ વર્ષની સમયમર્યાદામાં આ નવનિર્મિત ભવનનું નિર્માણ કાર્ય પૂર્ણ કરી તેને જાહેર જનતાની સેવામાં લોકાર્પિત કરવાનો દ્રઢ સંકલ્પ વ્યક્ત કરવામાં આવ્યો છે.

રાજ્યકક્ષાના મંત્રી કમલેશ પટેલ અને ધારાસભ્ય કાંતિભાઈ ખરાડી રહ્યા ઉપસ્થિત

આ ખાતમુહૂર્ત પ્રશાસનિક કાર્યક્રમ રાજ્યકક્ષાના મંત્રી કમલેશભાઈ પટેલના વરદહસ્તે યોજાયો હતો. આ પ્રસંગે સ્થાનિક ધારાસભ્ય કાંતિભાઈ ખરાડી વિશેષ ઉપસ્થિત રહ્યા હતા. આ ઉપરાંત, બનાસકાંઠા જિલ્લા પંચાયત પ્રમુખ વસંતભાઈ પુરોહિત, દાંતા તાલુકા પંચાયત પ્રમુખ પિન્કીબેન અશ્વિનકુમાર ચૌધરી સહિત સ્થાનિક આગેવાનો અને મોટી સંખ્યામાં ગ્રામજનો આ ઉજવણી અને શિલારોપણ સમારોહમાં જોડાયા હતા.

GIDC, સ્પોર્ટ્સ સંકુલ અને ક્રાફ્ટ સેન્ટર માટે મંત્રીને આવેદનપત્ર પાઠવાયું

કાર્યક્રમ દરમિયાન દાંતા તાલુકાના સર્વાંગી વિકાસને વેગ આપવા માટે તાલુકા પંચાયત પ્રમુખ પિન્કીબેન ચૌધરી દ્વારા મંત્રી કમલેશ પટેલને એક મહત્વનું આવેદનપત્ર સોંપવામાં આવ્યું હતું. જેમાં વિસ્તારમાં સ્પોર્ટ્સ સંકુલ, નવું બસસ્ટેન્ડ, સ્માર્ટ વિલેજ અને GIDCની ફાળવણી કરવાની માંગ કરાઈ હતી. આ ઉપરાંત, આદિવાસી સમાજના આર્થિક ઉત્થાન અને કૌશલ્ય વિકાસ માટે ખાસ ક્રાફ્ટ કેન્દ્ર સ્થાપવા સહિતની વિવિધ વિકાસલક્ષી માંગણીઓ પણ મંત્રી સમક્ષ રજૂ કરવામાં આવી હતી.

આ પણ વાંચો : Jamnagarમાં સિંહની એન્ટ્રીથી ફફડાટ, હડમતીયા ગામની સીમમાં સાવજ દેખાતા ગ્રામજનોમાં દહેશત