Bhavnagar News : અભયમ મહિલા હેલ્પલાઈને વર્ષ 2025માં 7219 પીડીત મહિલાઓની મદદ કરી

ગુજરાત સરકારના મહિલા અને બાળ વિકાસ અને ગૃહ વિભાગ દ્વારા અને ઇ.એમ.આર.આઇ ગ્રીન હેલ્થ સર્વિસ દ્વારા કાર્યાન્વિત અભયમ 181 મહિલા હેલ્પલાઇન ગુજરાતની પીડીત મહિલાઓ માટે આશીર્વાદરૂપ બની રહી છે. મહિલાઓના શારિરીક, માનસિક, જાતીય સતામણી કે ઘરેલુ હિંસા સહિતની હેરાનગતિમાં અસરકારક કાઉન્સિલિંગ, સરકારની એજન્સીઓ સાથે સંકલન કરી મદદ, માર્ગદર્શન અને બચાવ કરેલ છે.

ભાવનગરમાં અભયમ હેલ્પલાઈનની જબરદસ્ત કામગીરી

લગ્નજીવનના વિખવાદો, પાડોશી સાથેના અણબનાવ, બિનજરૂરી કોલ મેસેજ થી હેરાનગતિ, છેડતી વગેરે કિસ્સાઓમાં મદદરૂપ બની દીન-પ્રતિદિન મહિલાઓમાં વધુ વિશ્વાસ અને પ્રતિભાવ મેળવવામાં આવી રહેલ છે જેથી આજે ગુજરાતની મહિલાઓ, યુવતીઓ અને વિદ્યાર્થિનીઓ અભયમ એક સાચી સહેલી તરીકે બની રહી છે. જાન્યુઆરી 2025 થી ડિસેમ્બર 2025 દરમ્યાન અભયમ 181 મહિલા હેલ્પલાઇનમાં મદદ માટે ભાવનગર જીલ્લામાં ૭,૨૧૯ જેટલા જરૂરિયાતમંદ મહિલાઓના કોલ આવેલ જેમાંથી ૧૩૬૨ કિસ્સાઓમાં અભયમ રેસક્યું વાન ડિસ્પેચ, ૯૬૧ કેસોમાં સમાધાન અને ૩૫૦ મહિલાઓને બચાવ એજન્સીઓ રિફર કરવામાં આવ્યા હતા.

કાર્યકરો તરફથી નોંધપાત્ર સહયોગ મળી રહ્યો હતો

આ ઉપરાંત કસ્ટડીના ૨૬૧ કેસ, ઘરેલુ હિંસાના ૩૬૭૮ કેસ, લગ્નજીવનના વિખવાદો ૩૫૧ કેસ, જનરલ માહિતી અને સરકારી મહિલાલક્ષી યોજનાઓની પ્રાથમિક માહિતીના ૨૨૦ કેસ, શારીરિક, માનસીક, જાતીય હેરાનગતિના ૧૪૪૦ કેસ, પરીવાર છોડેલ ૧૩૪ કેસ, અન્ય સબંધોના ૧૧૫ કેસ, કાયદાકીય માર્ગદર્શન ૧૪૯ કોલ આવ્યાં હતાં. વર્ષ દરમિયાન જીલ્લા વહીવટી તંત્ર, પોલીસ વિભાગ, મહિલા અને બાળ વિકાસ વિભાગ, નારી સંરક્ષણ ગૃહ, ઓ.એસ.સી, પી.બી.એસ.સી, આશ્રય ગૃહ અને સ્થાનિક સંસ્થાઓ અને કાર્યકરો તરફથી નોંધપાત્ર સહયોગ મળી રહ્યો હતો.