C.R.Patilની પ્રેરણાદાયી પહેલ: ઈંધણ બચાવવા માટે પાયલોટિંગ અને એસ્કોર્ટ ગાડીઓનો સ્વેચ્છાએ કર્યો ત્યાગ

વડાપ્રધાન નરેન્દ્ર મોદી દ્વારા દેશવાસીઓને ઈંધણ બચાવવા અને કરકસર કરવા માટે કરવામાં આવેલી અપીલને માન આપીને કેન્દ્રીય જળશક્તિ મંત્રી સી.આર. પાટીલે એક ઐતિહાસિક નિર્ણય લીધો છે. તેમણે જાહેર કર્યું છે કે, વૈશ્વિક યુદ્ધની સ્થિતિ અને ક્રૂડ ઓઈલની કટોકટીને ધ્યાનમાં રાખીને તેઓ હવેથી કોઈપણ સરકારી કે ખાનગી કાર્યક્રમોમાં પાયલોટિંગ અથવા એસ્કોર્ટ કારનો ઉપયોગ કરશે નહીં. આ નિર્ણયનો અમલ તેમણે આજથી જ શરૂ કરી દીધો છે.

રાષ્ટ્રહિતમાં પેટ્રોલ-ડીઝલની બચતનો મંત્ર

સી.આર. પાટીલના આ નિર્ણય પાછળનો મુખ્ય ઉદ્દેશ્ય પેટ્રોલ અને ડીઝલની બચત કરી રાષ્ટ્રના અર્થતંત્રમાં યોગદાન આપવાનો છે. તેમણે જણાવ્યું હતું કે, જ્યારે વિશ્વ ક્રૂડ ઓઈલની અછતનો સામનો કરી રહ્યું હોય, ત્યારે એક જવાબદાર જનપ્રતિનિધિ તરીકે ઈંધણ બચાવવું એ આપણી નૈતિક ફરજ છે. એસ્કોર્ટ ગાડીઓનો કાફલો દૂર કરવાથી માત્ર ઈંધણની જ બચત નહીં થાય, પરંતુ સરકારી તિજોરી પરનું ભારણ પણ ઘટશે.

અન્ય મંત્રીઓ અને રાજ્યો માટે પ્રેરણાદાયી પગલું

કેન્દ્રીય મંત્રીની આ પહેલથી ભાજપ શાસિત રાજ્યોના મંત્રીમંડળો અને અન્ય ઉચ્ચ અધિકારીઓને પણ કરકસર માટે પ્રોત્સાહન મળશે. જે રીતે તેમણે ‘જળ શક્તિ’ અને ‘કેચ ધ રેઈન’ જેવા અભિયાનોને જન-આંદોલન બનાવ્યા છે, તેમ હવે ઈંધણ બચાવવાના સંદેશને પણ તેઓ જન-જન સુધી પહોંચાડવા માંગે છે. સામાન્ય નાગરિકોમાં પણ આ નિર્ણયથી સકારાત્મક સંદેશ ગયો છે કે જ્યારે નેતૃત્વ પોતે ત્યાગ કરે છે, ત્યારે જ સમાજમાં પરિવર્તન આવે છે.

ગુજરાતના વધુ સમાચાર વાંચવા માટે ક્લિક કરો