Gujarat રાજ્યમાં હવામાન વિભાગની મોટી આગાહી: 11 સપ્ટેમ્બરથી વધશે વરસાદનું જોર!

હવામાન વિભાગ દ્વારા ગુજરાતવાસીઓ માટે વરસાદને લઈને અત્યંત સારા સમાચાર આપવામાં આવ્યા છે. આગામી દિવસોમાં રાજ્યમાં ફરી એકવાર મેઘમહેર થવાના મજબૂત સંકેતો મળી રહ્યા છે. 11 સપ્ટેમ્બરના રોજ બંગાળની ખાડી અથવા અરબી સમુદ્રમાં એક નવું લો-પ્રેશર સક્રિય થઈ રહ્યું છે, જેના કારણે 11 થી 13 સપ્ટેમ્બર દરમિયાન રાજ્યના વિવિધ વિસ્તારોમાં ભારેથી અતિભારે વરસાદ પડે તેવી શક્યતા વ્યક્ત કરવામાં આવી છે.

દક્ષિણ ગુજરાત અને સૌરાષ્ટ્રમાં ભારે વરસાદના સંકેત 

હવામાન વિભાગની તારીખો અનુસાર 8, 9 અને 10 સપ્ટેમ્બર દરમિયાન રાજ્યના મોટાભાગના વિસ્તારોમાં વાદળછાયા વાતાવરણ વચ્ચે માત્ર હળવાથી સામાન્ય વરસાદી ઝાપટાં પડશે. જોકે, 11 સપ્ટેમ્બરે નવી વરસાદી સિસ્ટમ કાર્યરત થતાં જ મુખ્યત્વે દક્ષિણ ગુજરાત અને સૌરાષ્ટ્રના વિસ્તારોમાં મેઘરાજા રમઝટ બોલાવશે. સુરત, નર્મદા, તાપી, ડાંગ, નવસારી, વલસાડ તેમજ કેન્દ્રશાસિત પ્રદેશ દમણ અને દાદરા નગર હવેલીમાં ભારે વરસાદ થવાની સંભાવના દર્શાવવામાં આવી છે.

ખેડૂતો અને નાગરિકોમાં હર્ષની લાગણી 

સિસ્ટમ સક્રિય થવાને કારણે દક્ષિણ ગુજરાતના સરહદી જિલ્લાઓથી લઈને સૌરાષ્ટ્ર સુધી વરસાદનું જોર વધશે. સપ્ટેમ્બરના બીજા સપ્તાહમાં આવનારા આ ભારે વરસાદના સ્પેલથી ખેતીના પાકને નવું જીવન મળશે અને જળાશયોમાં પાણીની આવકમાં નોંધપાત્ર વધારો થશે. હવામાન વિભાગની આ સાનુકૂળ આગાહીથી રાજ્યના ખેડૂતો અને સામાન્ય નાગરિકોમાં આનંદ અને હર્ષની લાગણી ફરી વળી છે.

ગુજરાતના વધુ સમાચાર વાંચવા માટે ક્લિક કરો