Gujarat Assembly Bypoll 2026: ચૂંટણી પંચની મોટી જાહેરાત, ઉમરેઠ વિધાનસભા બેઠક પર યોજાશે પેટા ચૂંટણી

ગુજરાતના રાજકારણને લઈને મહત્વના સમાચાર સામે આવ્યા છે. આણંદ જિલ્લાની ખાલી પડેલી ઉમરેઠ વિધાનસભા બેઠક પર પેટા ચૂંટણીની જાહેરાત કરવામાં આવી છે. ચૂંટણી પંચ દ્વારા જાહેર કરવામાં આવેલા કાર્યક્રમ મુજબ, આગામી 23 એપ્રિલના રોજ આ બેઠક માટે મતદાન પ્રક્રિયા હાથ ધરવામાં આવશે.

વર્ષ 2022ની વિધાનસભા ચૂંટણીમાં આ બેઠક પરથી ભારતીય જનતા પાર્ટીના પીઢ નેતા ગોવિંદભાઈ પરમાર વિજેતા બન્યા હતા. જોકે, ગત 6 માર્ચ 2026ના રોજ 83 વર્ષની વયે તેમનું હૃદયરોગના હુમલાને કારણે આણંદ ખાતે અવસાન થયું હતું. તેમના નિધનને પગલે આ બેઠક ખાલી જાહેર કરવામાં આવી હતી, જેના પર હવે પેટા ચૂંટણી યોજાવા જઈ રહી છે.

ગોવિંદભાઈ પરમાર ઉમરેઠના લોકપ્રિય નેતા હતા અને તેઓ કુલ ત્રણ વખત (1995, 2017 અને 2022) ધારાસભ્ય તરીકે ચૂંટાયા હતા. વર્ષ 1998 થી 2002 દરમિયાન તેમણે ગુજરાત સરકારમાં કૃષિ મંત્રી તરીકે પણ પ્રશંસનીય સેવાઓ આપી હતી. 2011માં ભાજપમાં જોડાયા બાદ તેઓ પક્ષના મજબૂત સ્તંભ ગણાતા હતા.

પેટા ચૂંટણીની તારીખ જાહેર થતા જ આણંદ જિલ્લામાં રાજકીય ગરમાવો તેજ બન્યો છે. ભાજપ પોતાના આ ગઢને જાળવી રાખવા માટે પ્રયાસ કરશે, જ્યારે વિપક્ષ પણ આ બેઠક કબજે કરવા મથશે. 23 એપ્રિલે મતદાન થયા બાદ પરિણામો પર સમગ્ર રાજ્યની નજર રહેશે.

આ પણ વાંચો - પોલીસ પંચાત : નોકરી સુરત ગ્રામ્યમાં અને મેચના બંદોબસ્તનું કાર્ડ પહેરી અમદાવાદમાં ફર્યા મનુલાલ, કયા PI એ બારોબાર વહિવટદાર રાખી લીધો ?