Gujarat Local Body Election Results 2026: અરવલ્લીમાં પૂર્વ IPS મનોજ નિનામાની પરાજય, સાબરકાંઠા-પંચમહાલમાં ભાજપનો દબદબો

ગુજરાતમાં યોજાયેલી સ્થાનિક સ્વરાજ્યની ચૂંટણીઓના પરિણામોમાં અનેક રસપ્રદ કિસ્સાઓ સામે આવ્યા છે. ખાસ કરીને અરવલ્લી જિલ્લામાં એક દિગ્ગજ ચહેરાની હાર ચર્ચાનું કેન્દ્ર બની છે, જ્યારે પંચમહાલ અને સાબરકાંઠામાં સત્તાધારી પક્ષ ભાજપે પોતાની પકડ મજબૂત રાખી છે. બીજી તરફ નર્મદા જિલ્લામાં ત્રિપાંખિયા જંગના એંધાણ દેખાઈ રહ્યા છે.

અરવલ્લી જિલ્લામાં આ વખતની ચૂંટણીમાં સૌથી મોટો ઉલટફેર શામળાજીની ઓડ જિલ્લા પંચાયત બેઠક પર જોવા મળ્યો છે. અહીં ભાજપે પૂર્વ IPS અધિકારી મનોજ નિનામાને મેદાનમાં ઉતાર્યા હતા, પરંતુ તેમને કારમી હારનો સામનો કરવો પડ્યો છે. કોંગ્રેસના ઉમેદવાર સુરેશ નિનામાએ ૨૭૪૪ મતોની જંગી સરસાઈથી પૂર્વ IPSને હરાવીને આ બેઠક કોંગ્રેસના ફાળે કરી છે. આ જીત કોંગ્રેસ માટે મનોબળ વધારનારી સાબિત થઈ છે.

સાબરકાંઠા જિલ્લા પંચાયતની ૩૪ બેઠકોમાંથી અત્યાર સુધી ભાજપ ૦૭ અને કોંગ્રેસ ૦૨ બેઠકો પર વિજયી બન્યા છે.

હિંમતનગર નગરપાલિકા: અહીં ભાજપે 44 માંથી 25 બેઠકો મેળવીને સ્પષ્ટ બહુમતી તરફ પ્રયાણ કર્યું છે, જેમાં વોર્ડ ૮ ની આખી પેનલનો વિજય થયો છે.

પ્રાંતિજ તાલુકા પંચાયત: ૨૦ બેઠકો પૈકી ભાજપ 07 અને કોંગ્રેસ 05 બેઠકો પર જીત્યા છે, જ્યારે તાજપુર બેઠક પર કોંગ્રેસનો વિજય થયો છે.

ખેડબ્રહ્મા અને તલોદ: ખેડબ્રહ્માની ઝાંઝવા પાણાઇ બેઠક ભાજપે કબજે કરી છે, જ્યારે તલોદની ગોરા બેઠક પર કોંગ્રેસે જીત મેળવી છે.

પંચમહાલ જિલ્લા પંચાયતમાં ભાજપે ફરી એકવાર ભવ્ય જીત મેળવી છે. કુલ ૩૮ બેઠકોમાંથી અત્યાર સુધીમાં ૨૭ બેઠકો પર ભાજપના ઉમેદવારો વિજયી થતા પંચાયત પર ફરી ભગવો લહેરાયો છે. કોંગ્રેસ અને આપના અહીં હજુ સુધી સૂપડા સાફ રહ્યા છે.

બીજી તરફ, નર્મદા જિલ્લામાં સ્થિતિ રસપ્રદ છે. તિલકવાડા તાલુકા પંચાયતની ૧૧ બેઠકોમાંથી ૦૯ પર ભાજપ અને ૦૨ પર કોંગ્રેસની જીત થઈ છે. જોકે, નર્મદા જિલ્લા પંચાયતની ૨૨ બેઠકોમાં અત્યાર સુધીના પરિણામ મુજબ આમ આદમી પાર્ટી (AAP) ૦૮ બેઠકો સાથે ભાજપ (૦૬ બેઠક) કરતા આગળ નીકળી છે, જે આદિવાસી બેલ્ટમાં બદલાતા રાજકીય પવન તરફ ઈશારો કરે છે.