Gujarat Policeનો મોટો નિર્ણય, સાયબર સેન્ટર ઓફ એક્સેલન્સ માટે 50 સ્પેશિયલ કર્મચારીઓની નિમણૂંક

ડિજિટલ યુગમાં વધી રહેલા સાયબર અપરાધો પર લગામ કસવા માટે ગુજરાત પોલીસ એક્શન મોડમાં આવી છે. રાજ્યના ગૃહ વિભાગ અને પોલીસ મહાનિર્દેશક દ્વારા સાયબર ક્રાઈમ સામેની લડતને વધુ મજબૂત બનાવવા માટે મહત્વની નિમણૂંકો જાહેર કરવામાં આવી છે. રાજ્યમાં સાયબર સુરક્ષાને વધુ સઘન બનાવવા માટે કુલ 50 પોલીસ કર્મચારીઓને સીઆઈડી (CID) ક્રાઈમમાં કાર્યરત 'સાયબર સેન્ટર ઓફ એક્સેલન્સ' ખાતે મૂકવામાં આવ્યા છે.

એક વર્ષ માટે સ્પેશિયલ અસાઇનમેન્ટ

આ નિમણૂંક અંગેના સત્તાવાર આદેશ મુજબ, પસંદ કરાયેલા 50 કુશળ પોલીસ કર્મચારીઓને એક વર્ષ માટે અટેચના ધોરણે સાયબર સેન્ટર ઓફ એક્સેલન્સમાં કાર્યરત કરવામાં આવ્યા છે. આ કર્મચારીઓ સાયબર ક્રાઈમના જટિલ કેસોના ઉકેલ, ટેકનિકલ એનાલિસિસ અને ડિજિટલ ફોરેન્સિક જેવી કામગીરીમાં મદદરૂપ થશે.

વહીવટી અને નાણાકીય જોગવાઈ

મહત્વની વાત એ છે કે, આ કર્મચારીઓની સેવાઓ ભલે સીઆઈડી ક્રાઈમ ખાતે લેવામાં આવશે, પરંતુ તેમના પગાર અને અન્ય ભથ્થાં તેમની મૂળ કચેરીથી જ ચૂકવવામાં આવશે. આ નિમણૂંકથી સાયબર ક્રાઈમ ડિપાર્ટમેન્ટને વધુ મેનપાવર મળશે, જેનાથી કેસોના નિકાલની પ્રક્રિયા ઝડપી બનશે.

અત્યંત મહત્વનું પગલું

ગુજરાત પોલીસનું આ પગલું નાગરિકોની ડિજિટલ સુરક્ષા સુનિશ્ચિત કરવા અને સાયબર ઠગાઈના શિકાર બનેલા લોકોને ઝડપથી ન્યાય અપાવવા માટે અત્યંત મહત્વનું સાબિત થશે.

આ પણ વાંચો----      Bharuch : ઝઘડિયા GIDC આગ દુર્ઘટનામાં કામદારનું મોત, ચૈતર વસાવા અને મૃતકના પરિવારજન વચ્ચે સામ સામે લાફાવાળી