calendar_todaySeptember 16, 2026
Haridhwar: ગંગા સ્નાન કરતી મહિલાના વીડિયોનો AI દ્વારા ફેક વીડિયો બનાવાયો, ગંગા સભાની કડક કાર્યવાહીની માંગ!
ઉત્તરાખંડના પવિત્ર શહેર હરિદ્વાર સ્થિત હર કી પૌડી પર ગંગાઘાટ પર સ્નાન કરતી એક મહિલા ભક્તની તસવીર સાથે આર્ટિફિશિયલ ઇન્ટેલિજન્સ (AI) દ્વારા છેડછાડ કરીને તેને અર્ધ-નગ્ન સ્વરૂપે સોશિયલ મીડિયા પર વાયરલ કરવાનો ગંભીર મામલો સામે આવ્યો છે. આ શરમજનક ઘટનાને લઈને સ્થાનિક રહીશો અને ધાર્મિક સંસ્થાઓમાં ભારે આક્રોશ ફેલાયો છે. શ્રી ગંગા સભાએ આ કૃત્યને સીધેસીધો ધર્મ પરનો હુમલો ગણાવીને દોષિતો સામે કડક કાનૂની કાર્યવાહી કરવાની માંગ કરી છે.
મૂળ વીડિયો સાથે છેડછાડનું કાવતરું
પ્રાપ્ત વિગતો અનુસાર, આ વાયરલ વીડિયો હર કી પૌડીના પ્રખ્યાત માલવિયા ઘાટનો છે. કોઈ અસામાજિક તત્વે ઘાટ પર સ્નાન કરતી મહિલાનો ગુપ્ત વીડિયો બનાવીને તેને ઇન્ટરનેટ પર વાયરલ કર્યો હતો અને ત્યારબાદ AI ટેકનોલોજીની મદદથી તે મૂળ વીડિયોમાં છેડછાડ કરી. અસલી વીડિયોમાં મહિલાએ સલવાર સૂટ પહેરેલો હતો, પરંતુ બદમાશોએ AI નો દુરુપયોગ કરીને તેને અર્ધ-નગ્ન દર્શાવીને સોશિયલ મીડિયા પર ફેલાવી દીધો હતો.
પીડિત મહિલાનો દાવો અને સાયબર પોલીસ ફરિયાદ
આ વિવાદિત વીડિયો વાયરલ થયા બાદ સોશિયલ મીડિયા પર સોનમ યાદવ નામની એક મહિલા સામે આવી છે, જેણે દાવો કર્યો છે કે આ વાયરલ વીડિયો તેનો જ છે. મહિલાએ જણાવ્યું છે કે તેણે આ મામલે હરિયાણા સાયબર ક્રાઇમ બ્રાન્ચમાં સત્તાવાર ફરિયાદ નોંધાવી છે. જો કે, આ દાવા અંગે પોલીસ તરફથી હજુ સુધી સત્તાવાર પુષ્ટિ થવાની બાકી છે, પરંતુ આ ઘટનાએ સોશિયલ મીડિયા પર પ્રાઇવસી અને AI ના જોખમો અંગે મોટી ચર્ચા જગાવી છે.
શ્રી ગંગા સભાની કડક ચેતવણી
આ સમગ્ર પ્રકરણ પર ગંભીર નારાજગી વ્યક્ત કરતા શ્રી ગંગા સભાના પ્રમુખના જણાવ્યા અનુસાર AI ના માધ્યમથી આપણી માતાઓ અને બહેનોની તસવીરો સાથે ખેલ કરવાનો આ પ્રકારનો કુટિલ પ્રયાસ અત્યંત નિંદનીય છે. તીર્થસ્થાનોને બદનામ કરવા માટે રચાયેલા આ બનાવટી ષડયંત્ર દ્વારા સનાતન ધર્મ પર સીધો પ્રહાર કરવામાં આવી રહ્યો છે. સભાએ સરકાર અને પ્રશાસન પાસે માંગ કરી છે કે આ વીડિયો વાયરલ કરનારા અસામાજિક તત્વો વિરુદ્ધ તાત્કાલિક ગુનો નોંધીને દાખલારૂપ કડક કાર્યવાહી કરવામાં આવે.