Jamnagar AI ન્યૂઝ કાંડ, મુખ્ય સૂત્રધાર વિશાલ કણસાગરા સહિત 4 શખ્સો પોલીસ સકંજામાં

જામનગરમાં છેલ્લા કેટલાક સમયથી ચર્ચામાં રહેલા હાઈટેક AI ન્યૂઝ કાંડમાં પોલીસે મોટી સફળતા મેળવી છે. આ કૌભાંડના મુખ્ય સૂત્રધાર વિશાલ કણસાગરા સહિત કુલ ચાર આરોપીઓની ધરપકડ કરવામાં આવી છે. આરોપીઓ આર્ટિફિશિયલ ઈન્ટેલિજન્સ (AI) ટેકનોલોજીનો દુરુપયોગ કરી જાણીતા બિલ્ડરો, પ્રતિષ્ઠિત નેતાઓ અને સામાજિક અગ્રણીઓના વાંધાજનક વીડિયો તૈયાર કરતા હતા. આ વીડિયો સોશિયલ મીડિયા પર વાયરલ કરી તેમને બદનામ કરવાની ધમકી આપી લાખો રૂપિયાની ખંડણી ઉઘરાવવાનું આખું નેટવર્ક ચાલતું હતું. પોલીસે આ ગુનાની ગંભીરતાને જોતા આરોપીઓને કોર્ટમાં રજૂ કર્યા હતા, જ્યાં અદાલતે તેમના 8 દિવસના રિમાન્ડ મંજૂર કર્યા છે.

સોશિયલ મીડિયાનો ખતરનાક ખેલ

તપાસમાં એવો ચોંકાવનારો ખુલાસો થયો છે કે મુખ્ય આરોપી વિશાલ કણસાગરા પોલીસની પકડથી બચવા નેપાળમાં બેસીને આ તમામ વિવાદાસ્પદ પોસ્ટ અને વીડિયો અપલોડ કરતો હતો. આ ટોળકીએ ગુજરાતના પૂર્વ કૃષિ મંત્રી અને જામનગર ગ્રામ્યના વર્તમાન ધારાસભ્ય જેવા દિગ્ગજ નેતાઓને પણ સોશિયલ મીડિયાના માધ્યમથી નિશાન બનાવી તેમની છબી ખરડવાનો પ્રયાસ કર્યો હતો. રિમાન્ડ દરમિયાન પોલીસ એ જાણવાનો પ્રયાસ કરશે કે અત્યાર સુધી આ ટોળકીએ કેટલા લોકો પાસેથી ખંડણી વસૂલી છે અને આ ષડયંત્રમાં અન્ય કેટલા લોકો પડદા પાછળ રહીને મદદ કરી રહ્યા હતા. આ કિસ્સો ડિજિટલ યુગમાં ટેકનોલોજીના ઘાતક દુરુપયોગનું મોટું ઉદાહરણ પૂરું પાડે છે.

આ પણ વાંચો : Surat News : ટેક્સટાઈલ માર્કેટમાં કરોડોનું કૌભાંડ, રૂ. 1.98 કરોડની ઠગાઈ કરનાર અજય તોલાની ઝડપાયો