Kachchh News: ભચાઉમાં SMCના દરોડાના કેસમાં તત્કાલીન PI જાડેજા સસ્પેન્ડ

ભચાઉ પંથકમાં કેટલાક મહિનાઓ પહેલાં થયેલી સ્ટેટ મોનિટરિંગ સેલની દારૂની મોટી રેડનો મામલો ફરી એકવાર ચર્ચાના કેન્દ્રમાં આવ્યો છે.આ કેસમાં તત્કાલીન પોલીસ ઇન્સ્પેક્ટર એ.એ.જાડેજા સામે ચાલી રહેલી વિભાગીય તપાસ બાદ મહત્ત્વપૂર્ણ કાર્યવાહી કરવામાં આવી છે.સરહદી રેન્જના આઈજી દ્વારા પી.આઈ. એ.એ.જાડેજાને સસ્પેન્ડ કરવાનો આદેશ અપાતાં પોલીસ તંત્રમાં ભારે ચર્ચા જાગી છે.

ગેરકાયદેસર પ્રવૃત્તિ સામે બેદરકારી મામલે કાર્યવાહી

પ્રાપ્ત વિગતો અનુસાર ભચાઉ વિસ્તારમાં સ્ટેટ મોનિટરિંગ સેલે કેટલાક મહિનાઓ પહેલાં ગેરકાયદેસરના દારૂના જથ્થા પર મોટી કાર્યવાહી હાથ ધરી હતી.આ દરોડા દરમ્યાન અનેક મુદ્દાઓ સામે આવતાં સ્થાનિક પોલીસની ભૂમિકા પણ સવાલોના ઘેરામાં આવી હતી.ખાસ કરીને તે સમયના પી.આઈ.એ.એ.જાડેજાની કામગીરી અને બેદરકારી અંગે ઉચ્ચ અધિકારીઓ સુધી ફરિયાદો પહોંચતાં સમગ્ર મામલે આંતરિક તપાસ શરૂ કરાઈ હતી.

ઉચ્ચ પોલીસ અધિકારીઓએ કડક વલણ અપનાવ્યું

તપાસ દરમ્યાન મળેલા પ્રાથમિક પુરાવા અને વિભાગીય અહેવાલના પગલે ઉચ્ચ પોલીસ અધિકારીઓએ કડક વલણ અપનાવ્યું હોવાનું જાણવા મળ્યું હતું.છેવટે આઇજી કક્ષાએથી સસ્પેન્શનનો આદેશ જાહેર થતાં પોલીસ તંત્રમાં ખળભળાટ મચી ગયો છે.ગેરકાયદેસર પ્રવૃત્તિઓ સામે બેદરકારી દાખવનાર અથવા શંકાસ્પદ ભૂમિકા ભજવનાર અધિકારીઓ સામે હવે વિભાગ કોઇ પણ પ્રકારની ઢીલ રાખવાના મૂડમાં નથી.ભચાઉના આ કેસે ફરી એકવાર પોલીસ તંત્રની જવાબદારી અને પારદર્શિતાને લઇને ચર્ચા તેજ બનાવી છે.

આ પણ વાંચોઃ Bharuch: વાગરાના ગંધાર સોલ્ટમાં શેડ ધરાશાયી, શ્રમિક કાટમાળ નીચે દબાઈ જતા ઘટનાસ્થળે જ દમ તોડ્યો