Mehsana News: મહેસાણા છે કે મિર્ઝાપુર? નાગલપુર ચોકડી પાસે ફિલ્મીઢબે ફાયરિંગની ઘટનાથી ચકચાર!

મહેસાણા શહેરમાં ગુનાખોરોને જાણે પોલીસનો કોઈ જ ડર રહ્યો ન હોય તેમ કાયદો અને વ્યવસ્થાની સ્થિતિ સંપૂર્ણપણે કથળી ગઈ છે. મહેસાણા શહેરમાં સરેઆમ મર્ડરની ઘટનાની શાહી હજુ સુકાઈ ન હતી, ત્યાં જ સાંજના સમયે નાગલપુર ચોકડી નજીક આવેલા 'માધવી લસ્સી અને આઈસ્ક્રીમ પાર્લર' પાસે જાહેર રસ્તા પર દિલધડક ફાયરિંગની ઘટના બનતાં સમગ્ર મહેસાણા શહેર માટે આજનો દિવસ ભારે અશાંત અને 'બ્લેક ડે' સમાન સાબિત થયો છે.

કાર ટકરાવી સરેઆમ ધાણીફૂટ ફાયરિંગ કરાયું

મહેસાણા 'બી' ડિવિઝન પોલીસ સ્ટેશનની હદમાં આવેલી નાગલપુર ચોકડી પાસેથી ભાવેશ ઝાલા નામના વ્યક્તિ પોતાની સફેદ કલરની ફોર્ચ્યુનર કારમાં મિત્રો સાથે જઈ રહ્યા હતા. આ દરમિયાન સામેથી પૂરપાટ ઝડપે અને રોંગ સાઈડમાં આવેલી સફેદ રંગની સ્કોર્પિયો કારના ચાલકે ફોર્ચ્યુનર કારને 2 થી 3 વખત જોરદાર ટક્કર મારી હતી. કાર ટકરાવ્યા બાદ મામલો બિચક્યો હતો અને બંને પક્ષો વચ્ચે જાહેર રસ્તા પર સામસામે ધાણીફૂટ ગોળીબાર થયો હતો, જેનાથી આખા વિસ્તારમાં ભારે દહેશતનો માહોલ સર્જાયો હતો.

પોલીસનો કાફલો ઘટના સ્થળે, સ્થળ પરથી જીવંત અને મિસફાયર કાર્ટ્રિજ મળ્યા

ઘટનાની જાણ થતાં જ મહેસાણા 'બી' ડિવિઝન પોલીસનો કાફલો તાબડતોબ ઘટના સ્થળે દોડી આવ્યો હતો અને સુરક્ષાને ધ્યાને રાખી આખા વિસ્તારને કોર્ડન (સીલ) કરી દીધો હતો. પોલીસને તપાસ દરમિયાન સ્થળ પરથી 1 ફાયર થયેલું અને 1 મિસફાયર થયેલું કાર્ટ્રિજ/રાઉન્ડ મળી આવ્યું છે, જેનાથી ગોળીબાર થયો હોવાની સત્તાવાર પુષ્ટિ થઈ છે.

એફએસએલની ટીમ તપાસમાં જોડાઈ, સીસીટીવી આધારે નાકાબંધી

ઘટનાની ગંભીરતાને ધ્યાનમાં રાખીને એફએસએલ અને ફોરેન્સિક ટીમ દ્વારા સ્થળ પરથી વૈજ્ઞાનિક પુરાવા એકત્ર કરવાની કામગીરી હાથ ધરવામાં આવી છે. પોલીસે આસપાસની દુકાનો અને રસ્તાના સીસીટીવી ફૂટેજ કબ્જે કરીને સ્કોર્પિયો કાર અને હુમલાખોરોની ઓળખ મેળવવા ચક્રો ગતિમાન કર્યા છે. એક જ દિવસમાં મોટી ઘટનાઓ બનતાં પોલીસ તંત્ર હરકતમાં આવ્યું છે, અને આરોપીઓને ઝડપી પાડવા માટે અલગ-અલગ ટીમ બનાવીને સમગ્ર જિલ્લામાં કડક નાકાબંધી હાથ ધરી છે.

આ પણ વાંચો - Mehsana News: નાગલપુરમાં અંગત અદાવતમાં યુવકની ઘાતકી હત્યા, ચાર લોકોએ હુમલો કરી ગળુ કાપ્યું