Nandini Harinath: સ્મિથસોનિયન મ્યુઝિયમમાં ચમકી નંદિની હરિનાથની સાડી, જાણો કોણ છે ભારતની રોકેટ વુમન?

વોશિંગ્ટન ડીસીમાં આવેલું 'નેશનલ એર એન્ડ સ્પેસ મ્યુઝિયમ' વિશ્વભરના ઐતિહાસિક વિમાનો અને અવકાશયાન માટે જાણીતું છે. પરંતુ હવે ત્યાં આધુનિક મશીનોની વચ્ચે એક સાડી આકર્ષણનું કેન્દ્ર બની છે. આ કોઈ સામાન્ય સાડી નથી, પણ ભારતની સિદ્ધિ અને મહિલા વૈજ્ઞાનિકોના યોગદાનનું વૈશ્વિક પ્રતીક છે.

કોણ છે નંદિની હરિનાથ?

નંદિની હરિનાથ ઈન્ડિયન સ્પેસ રિસર્ચ ઓર્ગેનાઈઝેશન (ISRO) ના વરિષ્ઠ વૈજ્ઞાનિક છે. ભારતના ઐતિહાસિક મંગળયાન મિશન (Mars Orbiter Mission) માં તેમણે ડેપ્યુટી ઓપરેશન ડાયરેક્ટર તરીકે મહત્વની ભૂમિકા ભજવી હતી. તેમને ભારતની 'રોકેટ વુમન' તરીકે ઓળખવામાં આવે છે.

આ સાડી કેમ ખાસ છે?

ઐતિહાસિક ક્ષણ: મ્યુઝિયમ અનુસાર, આ સાડી નંદિની હરિનાથે એ દિવસે પહેરી હતી જ્યારે ભારતનું મંગળયાન પૃથ્વીની કક્ષા છોડીને મંગળ તરફની તેની 300 દિવસની મુસાફરી પર નીકળ્યું હતું.

દેખાવ: મ્યુઝિયમમાં લાલ અને વાદળી રંગની સુંદર પેટર્નવાળી આ સાડીને એક પૂતળા પર પ્રદર્શિત કરવામાં આવી છે.

સંદેશ: ભલે આ સાડી ક્યારેય અંતરિક્ષમાં નથી ગઈ, પણ તેને પહેરનાર મહિલાએ ભારતને બીજા ગ્રહ સુધી પહોંચાડવામાં મદદ કરી હતી. તે ભારતીય મહિલાઓની ક્ષમતાનું પ્રતીક છે.

નંદિની હરિનાથની પ્રેરણાદાયી સફર

નંદિનીનો જન્મ શિક્ષિત પરિવારમાં થયો હતો. તેમની માતા ગણિતના શિક્ષિકા અને પિતા એન્જિનિયર હતા. નાનપણમાં 'સ્ટાર ટ્રેક' જેવી સિરિયલો જોઈને તેમને અવકાશ વિજ્ઞાનમાં રસ જાગ્યો હતો. તેમણે ઈસરોમાં પોતાના 20 વર્ષના કરિયરમાં 14 થી વધુ મિશનમાં સફળતાપૂર્વક કામ કર્યું છે.

મંગળયાન મિશનની સફળતા

ભારતે 5 નવેમ્બર 2013 ના રોજ મંગળયાન લોન્ચ કર્યું હતું. આ મિશન સાથે ભારત મંગળ પર પહોંચનાર પ્રથમ એશિયાઈ દેશ અને વિશ્વનો ચોથો દેશ બન્યો હતો. સૌથી મોટી વાત એ છે કે આ મિશન તેના નિર્ધારિત સમય કરતા વધુ એટલે કે 8 વર્ષ સુધી કાર્યરત રહ્યું હતું.

આ પણ વાંચો- Petrol Diesel Price Today: 65 દેશોમાં પેટ્રોલના ભાવ રૂ.150થી વધારે, જાણો ભારતમાં શું છે લેટેસ્ટ રેટ?