calendar_todaySeptember 28, 2026
Narmada News: સાવરિયા મહારાજનું નિધન, શૂલપાણેશ્વર ખાતે લીધા અંતિમ શ્વાસ
નર્મદા મૈયાની અનન્ય ભક્તિ અને પરિક્રમાવાસીઓના માર્ગદર્શક તરીકે જાણીતા બનેલા સાવરિયા મહારાજનું લાંબી માંદગી બાદ નિધન થયું છે. તેમણે નર્મદા કાંઠે આવેલા પવિત્ર શૂલપાણેશ્વર ખાતે અંતિમ શ્વાસ લીધા હતા. છેલ્લા 2 વર્ષથી તેઓ ગંભીર બીમારીથી પીડાઈ રહ્યા હતા. તેમના અવસાનના સમાચાર મળતા જ સમગ્ર નર્મદા પંથક અને ભક્તગણમાં શોકનું મોજું ફરી વળ્યું છે.
3300 કિલોમીટરની અનેક પરિક્રમાઓનો અદ્ભુત રેકોર્ડ
સાવરિયા મહારાજ છેલ્લા 30 વર્ષથી માં નર્મદાની ભક્તિ અને સેવા સાથે અતુટ રીતે જોડાયેલા હતા. તેઓ ઉઘાડા પગે અને માત્ર કેસરી પોતડી પહેરીને આખી નર્મદા પરિક્રમા કરતા હતા. તેમણે જીવનમાં અનેક વખત અંદાજે 3,300 કિલોમીટર લાંબી નર્મદા પરિક્રમા પૂર્ણ કરી હતી, જે તેમની દ્રઢ શ્રદ્ધા અને ભક્તિનું ઉત્તમ ઉદાહરણ પૂરું પાડે છે. પરિક્રમા દરમિયાન તેઓ નિયમિતપણે નર્મદા સ્નાન પણ કરતા હતા.
લાખો લોકોને નર્મદા પરિક્રમા કરાવવાનો ભગીરથ દાવો અને પ્રેરણા
નિઃસ્વાર્થ ભાવે જીવન જીવનાર સાવરિયા મહારાજે લાખો લોકોને નર્મદા પરિક્રમા કરવા માટે પ્રેરિત કર્યા હતા. એક અંદાજ મુજબ તેમણે પોતાના જીવનકાળ દરમિયાન 4 લાખથી વધુ લોકોને નર્મદા પરિક્રમા કરાવ્યાનો દાવો કરવામાં આવે છે. શ્રદ્ધાળુઓ માટે તેઓ માત્ર એક સાધુ ન હતા, પરંતુ ચાલતી-ફરતી શ્રદ્ધા અને માર્ગદર્શક સમાન હતા.
ઉત્તર વાહિની નર્મદા પરિક્રમામાં મહત્વની ભૂમિકા
સમગ્ર રાજ્યમાં ઉત્તર વાહિની નર્મદા પરિક્રમાના મહત્વ વિશે લોકજાગૃતિ લાવવામાં સાવરિયા મહારાજની ભૂમિકા અત્યંત મહત્વની રહી છે. તેમના દ્વારા કરવામાં આવેલા સેવાકાર્યો અને સંતોષી જીવનને કારણે નર્મદા કાંઠાના સેંકડો પરિવારો અને શ્રદ્ધાળુઓ તેમને શ્રદ્ધાંજલિ પાઠવી રહ્યા છે.