PM મોદીની 30 જૂને તમામ કેન્દ્રીય મંત્રીઓ અને સચિવો સાથે ઉચ્ચસ્તરીય બેઠક યોજાશે, સુધારાઓ અને વિકાસ એજન્ડાની કરશે સમીક્ષા

વડાપ્રધાન નરેન્દ્ર મોદીએ મંગળવારે તમામ કેન્દ્રીય મંત્રાલયો અને વિભાગોના સચિવોની ઉચ્ચસ્તરીય બેઠક બોલાવી છે. આ બેઠકમાં સરકાર દ્વારા લોકોને જીવન સરળ બનાવવા અને વ્યવસાય સુગમતા વધારવા માટે હાથ ધરવામાં આવેલા સુધારા પગલાની સમીક્ષા કરવામાં આવશે. સાથે સાથે વિવિધ મહત્વપૂર્ણ મુદ્દાઓ પર પણ ચર્ચા થશે.

ભારતને વિકસિત રાષ્ટ્ર બનાવવા માટે લાંબા ગાળાનું લક્ષ્ય નક્કી કર્યું

મળતી માહિતી મુજબ કેટલાક સચિવો પોતાના મંત્રાલયોની પ્રગતિ અંગે પ્રેઝન્ટેશન રજૂ કરશે, જેમાં કામકાજની સ્થિતિ, જન-કેન્દ્રિત સુધારાઓ અને વિવિધ યોજનાઓના અમલીકરણની વિગતો સામેલ રહેશે. બેઠકમાં ગવર્નન્સ સુધારણા અને અમલીકરણ પ્રક્રિયા વધુ અસરકારક બનાવવા પર ખાસ ધ્યાન આપવામાં આવશે. વડાપ્રધાન મોદીએ 2047 સુધી ભારતને વિકસિત રાષ્ટ્ર બનાવવા માટે લાંબા ગાળાનું લક્ષ્ય નક્કી કર્યું છે. આ બેઠકમાં તેઓ આગામી પેઢીના સુધારાઓની સમીક્ષા કરશે, જેનાથી નાગરિકોના જીવનમાં સરળતા આવે અને વ્યવસાયિક વાતાવરણ વધુ અનુકૂળ બને.

દેશની આર્થિક સ્થિતિ પર પણ ચર્ચા થવાની શક્યતા

વડાપ્રધાન સચિવોને એ પણ સલાહ આપી શકે છે કે સરકારના તમામ વિભાગોમાં કામગીરી ઝડપી અને અસરકારક રહેવી જોઈએ તથા જનહિતની યોજનાઓમાં કોઈ વિલંબ ન થવો જોઈએ. તેઓ અગાઉ પણ સુધારાઓને લઈને ‘સુધાર રેલગાડી’ની જેમ સતત ગતિ જાળવવાની વાત કરી ચૂક્યા છે. બેઠકમાં દેશની આર્થિક સ્થિતિ પર પણ ચર્ચા થવાની શક્યતા છે, જેમાં નાણાકીય વર્ષ 2025-26માં જીડીપી વૃદ્ધિ દર 7.7 ટકા નોંધાયો છે. મજબૂત માંગ અને રોકાણના કારણે અર્થતંત્રમાં સુધારો જોવા મળ્યો છે.

આ પણ વાંચો : ભારત-સાઉદી અરબ વચ્ચે વોટર મેનેજમેન્ટ માટે મહત્વપૂર્ણ MoU, સહયોગને મળશે નવી દિશા