Porbandar News: કુતિયાણાના ટીંબીનેશ ગામે દૂધના નામે ઝેર બનાવવાનું રેકેટ ઝડપાયું

પોરબંદર જિલ્લામાં નાગરિકોના સ્વાસ્થ્ય સાથે ખુલ્લેઆમ ચેડાં કરતા ભેળસેળિયાઓ સામે એલસીબી (LCB) પોલીસે લાલ આંખ કરી છે. કુતિયાણા તાલુકાના ટીંબીનેશ ગામે એલસીબી ટીમે ચોક્કસ બાતમીના આધારે દરોડો પાડીને નકલી અને શંકાસ્પદ ભેળસેળયુક્ત દૂધ બનાવવાનું કાંડ ઝડપી પાડ્યું છે. પોલીસે સ્થળ પરથી ભેળસેળયુક્ત દૂધ બનાવીને લોકોના આરોગ્ય સાથે રમત રમતા સરમણ ગોગન કોડીયાતર નામના ઈસમને રંગેહાથ ઝડપી પાડ્યો છે.

સ્થળ પરથી કેમિકલ-તેલનો જથ્થો કબજે કરાયો

દરોડા દરમિયાન પોલીસને ઘટનાસ્થળેથી આશરે 30 લીટર જેટલું શંકાસ્પદ બનાવેલું દૂધ મળી આવ્યું હતું. આ સિવાય નકલી દૂધ બનાવવા માટે ઉપયોગમાં લેવાતો 75 કિલો સ્કીમ મિલ્ક પાવડર અને પામોલીન તેલના 14 ડબ્બા સહિતનો વિપુલ પ્રમાણમાં સામગ્રીનો જથ્થો મળી આવ્યો હતો. પોલીસે આ તમામ શંકાસ્પદ સાધન-સામગ્રી અને કેમિકલયુક્ત જથ્થો જપ્ત કરીને આગળની કાયદેસરની પ્રોસેસ હાથ ધરી છે.

સેમ્પલ લઈ શંકાસ્પદ દૂધનો સ્થળ પર જ નાશ કર્યો

ઘટનાની જાણ થતાં જ ફૂડ સેફ્ટી અધિકારીની ટીમ પણ સ્થળ પર પહોંચી ગઈ હતી. ફૂડ વિભાગે શંકાસ્પદ દૂધ અને મિલ્ક પાવડરના નમૂનાઓ લઈને લેબોરેટરીમાં ચકાસણી અર્થે મોકલી આપ્યા છે, જ્યારે માનવ વપરાશ માટે અતિ નુકસાનકારક એવા 30 લીટર શંકાસ્પદ દૂધનો સ્થળ પર જ નાશ કરવામાં આવ્યો હતો. પકડાયેલા આરોપી સરમણ કોડીયાતર સામે ફૂડ એન્ડ ડ્રગ્સ એક્ટની વિવિધ કલમો હેઠળ કડક ગુનો નોંધીને કાયદેસરની કાર્યવાહી હાથ ધરવામાં આવી છે.

ગુજરાતના વધુ સમાચાર વાંચવા માટે ક્લિક કરો