Rajkot News: પરસોતમ રૂપાલા અને મંત્રી જીતુ વાઘાણીએ PM મોદીના નેતૃત્વની સિદ્ધિઓ ગણાવી, ખેડૂતોના વિરોધ મુદ્દે મૌન સેવ્યું!

રાજકોટ ખાતે સાંસદ પરસોતમ રૂપાલા અને કૃષિમંત્રી જીતુ વાઘાણીએ એક મહત્વપૂર્ણ પત્રકાર પરિષદને સંબોધિત કરી હતી. કેન્દ્રમાં વડાપ્રધાન નરેન્દ્ર મોદીના નેતૃત્વ અને સરકારની વિવિધ લોકકલ્યાણકારી યોજનાઓની સફળતા તેમજ વિકાસ કાર્યોની વિગતો રજૂ કરવા માટે આ પ્રેસ કોન્ફરન્સનું આયોજન કરવામાં આવ્યું હતું. આ દરમિયાન બંને નેતાઓએ વડાપ્રધાન મોદીની વૈશ્વિક નેતા તરીકેની છબી અને દેશમાં આવેલા પરિવર્તનોની સરાહના કરી હતી.

મુખ્યમંત્રી કાળથી જ ઘડાયું હતું PMનું નેતૃત્વ: રૂપાલા

પત્રકાર પરિષદમાં સંબોધન કરતા રાજકોટના સાંસદ પરસોતમ રૂપાલાએ જણાવ્યું હતું કે, વડાપ્રધાન નરેન્દ્ર મોદીનું નેતૃત્વ અને તેમની કામ કરવાની આગવી શૈલી તેમના ગુજરાતના મુખ્યમંત્રી તરીકેના કાર્યકાળ દરમિયાન જ ઘડાઈ ચૂકી હતી. તેમણે ઉમેર્યું કે, વડાપ્રધાન મોદીએ સત્તા સંભાળ્યા બાદ દેશના સર્વાંગી વિકાસ માટે મહત્વની 100 જેટલી અલગ-અલગ યોજનાઓ ચિહ્નિત કરી હતી. આ ખૂબ જ આનંદની વાત છે કે, તેમાંથી અંદાજે 90 યોજનાઓ આજે સફળતાપૂર્વક પૂર્ણ થઈ ચૂકી છે અને દેશના છેવાડાના માનવી સુધી તેનો લાભ પહોંચ્યો છે. ખાસ કરીને પાણી પુરવઠા અને જળ વ્યવસ્થાપન ક્ષેત્રે વડાપ્રધાને દેશમાં ઘણું મોટું ભગીરથ કાર્ય કર્યું છે.

મંત્રી જીતુ વાઘાણીએ વર્ણવી સરકારની સિદ્ધિઓ

આ પ્રસંગે ઉપસ્થિત કૃષિમંત્રી જીતુ વાઘાણીએ પણ વડાપ્રધાન નરેન્દ્ર મોદીના વિઝનરી નેતૃત્વ હેઠળ દેશ અને ગુજરાતમાં થયેલા વિવિધ વિકાસ કાર્યોની આંકડાકીય વિગતો રજૂ કરી હતી. તેમણે સરકારની વિવિધ યોજનાઓથી સામાન્ય નાગરિકોના જીવનમાં આવેલા સકારાત્મક બદલાવ અને આર્થિક સિદ્ધિઓનો સવિસ્તાર ઉલ્લેખ કર્યો હતો.

ખેડૂતોના વિરોધ પ્રદર્શન અંગે મૌન સાધ્યું

સરકારના વિકાસ કાર્યોના ગુણગાન ગાવા વચ્ચે આ પત્રકાર પરિષદમાં એક રાજકીય ગરમાવો પણ જોવા મળ્યો હતો. જ્યારે પત્રકારો દ્વારા સુરેન્દ્રનગર તેમજ મોરબી જિલ્લામાં સ્થાનિક ખેડૂતો દ્વારા સરકાર સામે કરવામાં આવી રહેલા ઉગ્ર વિરોધ પ્રદર્શન અંગે સવાલ પૂછવામાં આવ્યો, ત્યારે બંને નેતાઓએ આ સંવેદનશીલ મુદ્દે કશું પણ બોલવાનું સ્પષ્ટપણે ટાળ્યું હતું અને પ્રશ્નનો સીધો જવાબ આપ્યા વિના મૌન સેવી લીધું હતું. આ બાબત હાલ રાજકીય વર્તુળોમાં ભારે ચર્ચાનો વિષય બની છે.

આ પણ વાંચો - Rajkotમાં તસ્કરો બન્યા બેફામ: ઉમાકાંત ઉદ્યોગનગરમાં કારખાનાને બનાવ્યું નિશાન