Shamlaji પાસે નેશનલ હાઈવે-48નો બ્રિજ ક્ષતિગ્રસ્ત, એક સાઈડનો માર્ગ બંધ કરી ટ્રાફિક સર્વિસ રોડ પર ડાયવર્ટ કરાયો

ગુજરાત અને રાજસ્થાનને જોડતા અત્યંત મહત્વના એવા નેશનલ હાઈવે-48 પર શામળાજી પાસે આવેલો હાઈવેનો બ્રિજ અચાનક ક્ષતિગ્રસ્ત થતા તંત્રમાં દોડધામ મચી ગઈ છે. બ્રિજમાં તિરાડ કે નુકસાન દેખાતા સલામતીના ભાગરૂપે હાઈવે ઓથોરિટી અને પોલીસે બ્રિજની એક સાઈડનો વાહનવ્યવહાર તાત્કાલિક અસરથી બંધ કરી દીધો છે.

સર્વિસ રોડ પર ટ્રાફિકનું ભારણ વધ્યું

બ્રિજ ક્ષતિગ્રસ્ત થવાને કારણે શામળાજીથી રતનપુર તરફ જતા હાઈવેના ટ્રાફિકને હવે સર્વિસ રોડ પર ડાયવર્ટ કરવામાં આવ્યો છે. મુખ્ય બ્રિજ બંધ થવાથી વાહનોની લાંબી કતારો જોવા મળી રહી છે અને ટ્રાફિકની ગતિ ધીમી પડી ગઈ છે. ખાસ કરીને ભારે વાહનોને કારણે શામળાજી સર્વિસ રોડ પર જામ જેવી સ્થિતિ સર્જાઈ રહી છે.

સમારકામ માટેની તજવીજ શરૂ

હાઈવે ઓથોરિટીના અધિકારીઓ ઘટનાસ્થળે પહોંચી બ્રિજની ક્ષતિનું નિરીક્ષણ કરી રહ્યા છે. જ્યાં સુધી બ્રિજનું સમારકામ પૂર્ણ ન થાય ત્યાં સુધી વાહનચાલકોને સર્વિસ રોડનો ઉપયોગ કરવા સૂચના અપાઈ છે. રાજસ્થાનથી આવતા અને ગુજરાત તરફ જતા પ્રવાસીઓને આ ડાયવર્ઝનને કારણે મુસાફરીમાં વધુ સમય લાગી શકે છે. તંત્ર દ્વારા યુદ્ધના ધોરણે કામગીરી શરૂ કરવામાં આવી છે જેથી હાઈવે પરનો ટ્રાફિક ફરી રાબેતા મુજબ કરી શકાય.

આ પણ વાંચો ----    Ahmedabadમાં ગાયના શુદ્ધ ઘી ના નામે વેચાતા ઝેરનો પર્દાફાશ, 400 કિલો નકલી ઘી નો જથ્થો જપ્ત