Surat News: સરથાણામાં અકસ્માત બાદ આરોગ્ય મંત્રીની માનવતા, 108ની રાહ જોયા વગર પોતાની પાયલોટિંગ જીપમાં ઈજાગ્રસ્તને હોસ્પિટલ મોકલ્યો

સુરત શહેરના સરથાણા વિસ્તારમાં આવેલા એન્થમ સર્કલ પાસે આજે એક અકસ્માતની ઘટના સર્જાઈ હતી. ભારે ટ્રાફિક જામ વચ્ચે બનેલી આ દુર્ઘટનામાં એક યુવક ગંભીર રીતે ઈજાગ્રસ્ત થયો હતો. આ સમયે ત્યાંથી પસાર થઈ રહેલા રાજ્યના આરોગ્ય મંત્રી પ્રફુલ પાનસેરીયાએ કાફલો રોકાવીને તાત્કાલિક ઈજાગ્રસ્ત યુવકની મદદે દોડી જઈ માનવતાનું ઉત્તમ ઉદાહરણ પૂરું પાડ્યું હતું.

પાયલોટિંગ પોલીસ કાર બની એમ્બ્યુલન્સ

એન્થમ સર્કલ વિસ્તારમાં ટ્રાફિક જામ હોવાને કારણે 108 એમ્બ્યુલન્સને પહોંચવામાં વિલંબ થઈ શકે તેમ હતો. પરિસ્થિતિની ગંભીરતા સમજીને મંત્રી પ્રફુલ પાનસેરીયાએ એક પણ ક્ષણનો સમય ગુમાવ્યા વગર યુવકનો જીવ બચાવવા માટે તજવીજ હાથ ધરી હતી. તેમણે પ્રોટોકોલની પરવા કર્યા વગર પોતાની પાયલોટિંગ પોલીસ જીપમાં જ ઈજાગ્રસ્ત યુવકને બેસાડીને તાત્કાલિક સારવાર અર્થે હોસ્પિટલ રવાના કર્યો હતો.

ટ્રાફિક હળવો કરાવી યુવકને સમયસર સારવાર અપાવી

અકસ્માતને પગલે રસ્તા પર સર્જાયેલા ભારે ટ્રાફિક જામમાં ઈજાગ્રસ્તને લઈ જતી ગાડી ફસાય નહીં તે માટે મંત્રીએ જાતે ઊભા રહીને ટ્રાફિક દૂર કરાવવાની કામગીરી પણ કરી હતી. યુવકને સમયસર સારવાર મળી રહે તે માટે મંત્રીએ પર્સનલી ધ્યાન આપીને તેને હોસ્પિટલ પહોંચાડવાની વ્યવસ્થા કરી હતી. એક જવાબદાર પદ પર હોવા છતાં સામાન્ય નાગરિકના જીવની રક્ષા માટે મંત્રીએ દાખવેલી આ તત્પરતા અને સંવેદનશીલતા જોઈને ત્યાં હાજર સ્થાનિક લોકોએ તેમનો આભાર માની કામગીરીને બિરદાવી હતી.

ગુજરાતના વધુ સમાચાર વાંચવા માટે ક્લિક કરો