Vadodara News: વડોદરા GSFC પ્લાન્ટમાં ગેસ ગળતર, સાથી કર્મચારીને બચાવવા જતાં કોન્ટ્રાક્ટ કર્મચારીનું મોત

વડોદરામાં આવેલી પ્રસિદ્ધ ગુજરાત સ્ટેટ ફર્ટિલાઇઝર્સ એન્ડ કેમિકલ્સ કંપનીના યુરિયા પ્લાન્ટમાં અચાનક વાયુ ગળતરની ગંભીર ઘટના સામે આવી છે. પ્લાન્ટમાં ગેસ લીકેજ થતાં જ ત્યાં કામ કરી રહેલા કર્મચારીઓમાં ભારે અફરાતફરી મચી ગઈ હતી. આ દુર્ઘટનાને પગલ કર્મચારીઓમાં ડરનો માહોલ જોવા મળ્યો હતો.

સાથી કર્મચારીને બચાવવા જતાં ઘનશ્યામ ગોહિલે ગુમાવ્યો જીવ

આ દુર્ઘટનામાં ઘનશ્યામ ગોહિલ નામના કોન્ટ્રાક્ટ કર્મચારીનું કરુણ મોત નીપજ્યું છે. મળતી માહિતી અનુસાર, યુરિયા પ્લાન્ટમાં ગેસ ગળતર થતાં જ એક અન્ય કર્મચારી તેની ઝપેટમાં આવી ગયો હતો. ઘનશ્યામ ગોહિલે પોતાના સાથી કર્મચારીનો જીવ બચાવવા માટે વીરતાપૂર્વક પ્રયાસ કર્યો હતો, પરંતુ આ દરમિયાન પોતે ગંભીર રીતે ગેસની અસર હેઠળ આવી જતાં તેમનું પ્રાણપંખેરું ઊડી ગયું હતું.

ઘટના અંગે તપાસનો ધમધમાટ શરૂ

આ ગંભીર ઘટનાની જાણ થતાં જ કંપનીના ઉચ્ચ અધિકારીઓ અને સુરક્ષા ટીમ તુરંત પ્લાન્ટ પર દોડી આવી હતી. ગેસ લીકેજ કયા કારણોસર થયું અને સુરક્ષામાં ક્યાં ચૂક રહી ગઈ તે અંગે તંત્ર દ્વારા કાયદેસરની તપાસ હાથ ધરવામાં આવી છે. ઘટનાને પગલે મૃતકના પરિવારજનો અને કંપનીના અન્ય કર્મચારીઓમાં ભારે શોકની લાગણી છવાઈ ગઈ છે.

આ પણ વાંચો: Vadodara: જરોદ ગામે જન્માષ્ટમીના મેળામાં જનમેદની ઊમટી