calendar_today
April 29, 2026
Anand: આણંદ જિલ્લા પંચાયતમાં 33 બેઠકો સાથે ભાજપની પ્રચંડ જીત
આણંદ જિલ્લા પંચાયતની સામાન્ય ચૂંટણીના પરિણામોમાં ભારતીય જનતા પાર્ટીએ ભવ્ય વિજય મેળવીને સત્તા પર ફરી એકવાર કબજો જમાવ્યો છે. કુલ 40 બેઠકોમાંથી ભાજપે 33 બેઠકો પર જીત મેળવીને વિરોધ પક્ષ કોંગ્રેસને માત્ર 7 બેઠકો પર સીમિત કરી દીધું છે. જોકે, ભાજપ માટે આ જીત જેટલી ભવ્ય છે તેટલી જ પ્રમુખ પદની પસંદગી માટે મુંઝવણભરી પણ સાબિત થઈ શકે છે. આ વખતે જિલ્લા પંચાયત પ્રમુખ પદ માટે એસટી (ST) અનામત હોવાથી, હાડગુડ બેઠક પરનો વિજય નિર્ણાયક હતો. પરંતુ આ બેઠક પર કોંગ્રેસના ઉમેદવાર ગૌરીબેન તડવીનો વિજય થતાં ભાજપ પાસે એસટી કેટેગરીના વિજેતા ઉમેદવારની ખોટ વર્તાઈ રહી છે. ભાજપે સ્પષ્ટ બહુમતી તો મેળવી લીધી છે અને તેનું શાસન યથાવત રહેશે, પરંતુ પ્રમુખ પદ માટે હવે ભાજપે હાડગુડના બદલે અન્ય કોઈ વિકલ્પ કે કાયદાકીય પાસાઓ પર ધ્યાન કેન્દ્રિત કરવું પડે તેવી પ્રબળ સંભાવના છે. આણંદ જિલ્લા પંચાયતમાં ભાજપે શરૂઆતથી જ દબદબો જાળવી રાખ્યો હતો. ચિખોદરા બેઠક પર સપનાબેન પરમાર, પાળજ બેઠક પર પ્રદિપકુમાર પટેલ અને વણસોલ બેઠક પર રીનાબેન ગોહેલ બિનહરીફ્ વિજેતા જાહેર થયા હતા.ભાજપના અન્ય વિજેતાઓમાં અલારસાથી અશોકકુમાર મહિડા, બામણગામથી જ્યોત્સનાબેન સોલંકી, બાંધણીથી સુરેશભાઇ સોલંકી, ભાદરણથી ભાર્ગવીબેન પટેલ, ભાલેજથી કેતનકુમાર પટેલ (રોયલ મેડીકલ), અને બોચાસણથી નયનાબેન ઠાકોરનો સમાવેશ થાય છે. આ ઉપરાંત, ડભોઉમાં કિંજલબેન રાઠોડ, ધર્મજમાં જગદીશભાઇ વણકર, ગોલાણામાં વજુબેન ગોહેલ, જંત્રાલમાં સરોજબેન પરમાર અને કહાનવાડીમાં વીનાબેન પઢિયારે જીત મેળવીને પક્ષની બહુમતીને મજબૂત બનાવી હતી. મધ્ય ગુજરાતના આ રાજકીય જંગમાં ભાજપે કલમસર બેઠક પર જીલુભાઇ સિંઘા, કાસોરમાં રણછોડભાઇ પરમાર, કઠાણામાં દક્ષાબેન સોલંકી અને ખંભોળજમાં સુનિલકુમાર સોલંકીના વિજય સાથે પકડ જાળવી રાખી હતી. મહેળાવમાં સંગીતાબેન વાઘેલા, મોરજમાં રમીલાબેન પરમાર, નગરામાં ચંદ્રિકાબેન પટેલ અને નાપા તળપદમાં સાજીદખાન રાણાએ કેસરીયો લહેરાવ્યો હતો. પંડોળી, સામરખા, સારસા અને શકરપુરમાં અનુક્રમે મંગુબેન સોલંકી, હંસાબેન પરમાર, મયૂરી પટેલ અને નિમીષાબેન મકવાણા વિજેતા બન્યા હતા. તેમજ સિંહોલ, સુરેલી, ઉંદેલ, વલાસણ, વરસડા, વાસદ અને વટાદરામાં ભાજપના ઉમેદવારોએ જંગી બહુમતી સાથે વિજય મેળવીને કોંગ્રેસના સૂપડા સાફ્ કરી દીધા હતા. સામે પક્ષે કોંગ્રેસે માત્ર 7 બેઠકો પર સંતોષ માનવો પડયો છે, જેમાં આસોદરથી મનુભાઈ પઢીયાર, દહેવાણથી કૈલાસબેન પરમાર, દાવોલથી જયદીપસિંહ ગોહેલ અને હાડગુડથી ગૌરીબેન તડવીએ વિજય મેળવ્યો છે. આ ઉપરાંત કંકાપુરામાં દીપસિંહ પરમાર, નાપાડ વાંટામાં પિયુષકુમાર રાજ અને શીલીમાં વિજયસિંહ ચૌહાણ કોંગ્રેસની લાજ રાખવામાં સફ્ળ રહ્યા હતા. ખાસ કરીનેહાડગુડમાં કોંગ્રેસના વિજયે ભાજપની છાવણીમાં પ્રમુખ પદ માટે ચિંતા વધારી દીધી છે. ભાજપની સ્પષ્ટ બહુમતી હોવાથી શાસન તો ભાજપનું જ રહેશે, પરંતુ પ્રમુખ પદના અનામત સમીકરણોને જોતા પક્ષ હવે કઈ રીતે આગળ વધશે અને હાડગુડના બદલે અન્ય કઈ બેઠકના ઉમેદવારને કઈ રીતે પ્રમુખ પદ માટે પસંદ કરશે તે હવે જોવાનું રહેશે.ગુજરાતના વધુ સમાચાર વાંચવા માટે ક્લિક કરો
Read Full Story
arrow_forward
