Community News & Updates

Stay informed with the latest happenings, achievements, and announcements from our community.

All News

calendar_today September 10, 2026

Dholka: APMCમાં કિસાન વિકાસ પેનલનો ભવ્ય વિજય

ધોળકા APMC માર્કેટ યાર્ડની ચૂંટણીમાં ખેડૂત સહકાર પેનલ અને કિસાન વિકાસ પેનલ વચ્ચે પ્રતિષ્ઠાનો જંગ જામ્યો હતો. ભારે રસાકસી વચ્ચે જાહેર થયેલા ચૂંટણી પરિણામોમાં કિસાન વિકાસ પેનલે પૂર્ણ બહુમતી સાથે ભવ્ય વિજય મેળવી પેનલને મોટો ઝટકો આપ્યો છે. મહત્વનું છે કે ધોળકા APMC માર્કેટ યાર્ડમાં છેલ્લા 15 વર્ષથી ભાજપનો દબદબો રહ્યો હતો. જોકે, આ વખતે કિસાન વિકાસ પેનલે ભાજપના ગઢમાં ગાબડું પાડી સત્તા પરિવર્તનનો સંકેત આપ્યો છે. લાંબા સમયથી ચાલતા ભાજપના વર્ચસ્વનો અંત લાવી કિસાન વિકાસ પેનલે APMCમાં પોતાનો ડંકો વગાડયો છે. ચૂંટણીના પરિણામો જાહેર થતાં જ કિસાન વિકાસ પેનલના વિજેતા ઉમેદવારો અને સમર્થકોમાં ભારે ઉત્સાહ જોવા મળ્યો હતો. વિજયની ખુશીમાં ઢોલ-નગારાના તાલે ઉજવણી કરવામાં આવી, ફ્ટાકડા ફેડવામાં આવ્યા અને એકબીજાના મોં મીઠા કરાવવામાં આવ્યા હતા. વિજેતા ઉમેદવારોનું ફૂલહાર પહેરાવી ભવ્ય સ્વાગત કરવામાં આવ્યું હતું. 15 વર્ષના ભાજપના દબદબાનો અંત અને કિસાન વિકાસ પેનલનો વિજય ધોળકા APMCની રાજકીય-સહકારી વ્યવસ્થામાં મોટા ફેરફારના સંકેત તરીકે જોવામાં આવી રહ્યો છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today September 10, 2026

Anand: શક્કરપુર બળિયાદેવ મંદિરમાં આજે હવન અને મહા આરતી

ખંભાતના શક્કરપુર વિસ્તારમાં આવેલું શ્રી મોટા બળીયાદેવ મહારાજનું પૌરાણિક મંદિર વર્ષોથી આસ્થા, શ્રાદ્ધા અને પરંપરાનું કેન્દ્ર રહ્યું છે. ચરોતરના 42 ગામો અને 24 પરગણાના દેવ તરીકે જાણીતા બળિયા બાપજી પ્રત્યે ખંભાત સહિત આસપાસના વિસ્તારોના લોકોની અતૂટ શ્રાદ્ધા છે. બળીયાદેવ મહારાજને લોકઆસ્થાના દેવ તરીકે પૂજવામાં આવે છે અને ખાસ કરીને આરોગ્ય, સુખ-શાંતિ તથા વિવિધ બાધાઓમાંથી મુક્તિ માટે ભક્તો શ્રાદ્ધાપૂર્વક તેમની આરાધના કરે છે. શક્કરપુરધામના બળીયાદેવ મહારાજના મહિમાનો સ્કંદ પુરાણમાં પણ ઉલ્લેખ હોવાનું વર્ષોથી મંદિરની પૂજા-અર્ચના સાથે જોડાયેલા ભાગ્યેશભાઈ ભટ્ટ જણાવે છે. અમાસના પાવન દિવસે બળિયા બાપજીના દર્શન કરી પૂજન-અર્ચન અને વધામણાં અર્પણ કરવાની પરંપરા પણ વર્ષોથી ચાલી આવે છે.આ પાવન પરંપરાને અનુસરી આજે શ્રાવણી અમાસ નિમિત્તે શક્કરપુરધામ સ્થિત શ્રી મોટા બળીયાદેવ મહારાજ મંદિર ખાતે ભવ્ય ધાર્મિક કાર્યક્રમનું આયોજન કરવામાં આવ્યું છે. આજે સવારે 9 વાગ્યાથી હવનનો પ્રારંભ થશે અને બપોરે 12 વાગ્યે શ્રીફ્ળ હોમવાની વિધિ સાથે પૂર્ણાહુતિ કરવામાં આવશે. ત્યારબાદ તુરંત જ ભવ્ય મહાઆરતી યોજાશે. પરંપરા મુજબ ગુપ્ત પૂજા અંતર્ગત દીપ અર્પણ વિધિ પણ કરવામાં આવશે. લોકકલ્યાણ, સર્વજનના સુખ-શાંતિ અને મંગલની ભાવના સાથે યોજાનારા આ ધાર્મિક પ્રસંગે મોટી સંખ્યામાં ભક્તો ઉમટે તેવી શક્યતા છે. મંદિર પ્રશાસન અને આયોજકો દ્વારા ખંભાત શહેર તેમજ આસપાસના વિસ્તારના સર્વે ધર્મપ્રેમી નાગરિકો અને માઈભક્તોને પરિવાર સાથે ઉપસ્થિત રહી બળિયા બાપજીના દર્શન, હવન તથા મહાઆરતીનો લાભ લેવા ભાવભર્યું આમંત્રણ આપવામાં આવ્યું છે.શક્કરપુરના બળીયાદેવ મહારાજ સાથે જોડાયેલી વધામણાંની પરંપરા પણ ખંભાતની આગવી ધાર્મિક અને સાંસ્કૃતિક ઓળખ બની છે. દર વર્ષે ચૈત્ર મહિનાની શરૂઆતમાં પણ ખંભાતના વિવિધ વિસ્તારોમાંથી ભક્તો ઘરમાં પ્રસાદ તૈયાર કરી શોભાયાત્રા સ્વરૂપે મંદિરે પહોંચે છે અને ભગવતી આલેખથી શણગારેલા દંડ તથા નૈવેદ્ય સાથે બળિયા બાપજીને વધામણાં અર્પણ કરે છે. ખંભાત તથા આસપાસના ગ્રામ્ય વિસ્તારોમાંથી વિવિધ જ્ઞાતિના અને 18 વર્ણના ભાવિકો શ્રાદ્ધાપૂર્વક આ પરંપરામાં જોડાય છે, જેના કારણે મંદિર પરિસરમાં ભક્તિ અને એકતાનું અનોખું વાતાવરણ સર્જાય છે. શ્રાવણી અમાસના કાર્યક્રમને અનુલક્ષીને ભક્તોને કોઈ અગવડ ન પડે તે માટે પાણી, આરામ અને જરૂરી માર્ગદર્શન સહિતની વ્યવસ્થાઓ કરવામાં આવી રહી છે. શક્કરપુરધામના આ પવિત્ર પ્રસંગે મોટી સંખ્યામાં ભક્તો પધારી બળિયા બાપજીના આશીર્વાદ મેળવે તેવી આયોજકો દ્વારા અપીલ કરવામાં આવી છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today September 10, 2026

Limbdi: બેંક અને દસાડાના બે મંદિરમાં તસ્કરોનો હાથફેરો

સુરેન્દ્રનગર જિલ્લામાં ચોરીની વારદાતો ચિંતાજનક રીતે વધી રહી છે. જેમાં લીંબડી એસબીઆઈમાંથી રૂપીયા 1 લાખ મહિલા તફડાવી ગઈ છે. બીજી તરફ દસાડાના નાના ગોરૈયાની સીમમાં આવેલ હનુમાનજી મંદિર અને પાટડી-ખારાઘોડા રોડ પર આવેલ સીંધાઈ માતાના મંદિરે તસ્કરોએ હાથ ફેરો કર્યો છે. પોલીસે ચોરીની ફરિયાદો નોંધીને તસ્કરોનું પગેરૂ મેળવવા તપાસના ચક્રો ગતીમાન કર્યા છે.લીંબડીના બહીલાપરામાં રહેતા 51 વર્ષીય મહેન્દ્રસિંહ સુરેન્દ્રસિંહ પરમાર લીંબડી તળાવ કાંઠે પોતાની માનવ સહાય ટ્રસ્ટની ઓફીસમાં પીજીવીસીએલની કલેકશન એજન્સી ચલાવે છે. તા. 17-8ના રોજ તેઓ કલેકશનના રૂપીયા 1 લાખ જેમાં 500ની નોટના 2 બંડલ હતા તે લઈને લીંબડી સ્ટેશન રોડ પર આવેલ એસબીઆઈમાં ભરવા ગયા હતા. જેમાં તેઓ પાસબુકની એન્ટ્રી કરાવવા લાઈનમાં ઉભા હતા ત્યારે કોઈ મહિલા નજર ચુકવી રૂપીયા 1 લાખની ઉઠાંતરી કરીને લઈ ગઈ હતી. આ સમગ્ર ઘટના બેંકના સીસીટીવીમાં કેદ થઈ હતી. આ અંગે તા. 99ના રોજ મોડી સાંજે લીંબડી પોલીસ મથકે અજાણી મહિલા સામે ફરિયાદ નોંધાઈ છે. આરોપી મહિલાને ઝડપી લેવા વધુ તપાસ પીએસઆઈ એમ.એમ.બારૈયા ચલાવી રહ્યા છે. જયારે દસાડા તાલુકાના નાના ગોરૈયા ગામની સીમમાં સડલાના રસ્તે ગોઢીયા હનુમાનજીનું મંદિર આવેલુ છે. તા. 9-9ના રોજ સવારે મંદિરના પુજારી હરેશગીરી પ્રહલાદગીરી ગોસ્વામી મંદિરે આરતી કરવા જતા દરવાજા ખુલ્લા જોયા હતા. અને દરવાજાના નકુચા તુટેલા હતા. મંદીરમાં હનુમાન દાદાને ચડાવેલ મુગટ, છત્તર, કાનના કુંડળ અને દાનપેટી તોડી રોકડ કોઈ ચોરી કરી લઈ ગયુ હતુ. બાદમાં દર્શને આવેલા નાના ગોરૈયાના મણીલાલ પટેલને પુજારીએ આ વાત કરી હતી. જેમાં બજાણા પોલીસ મથકે તા. 9ના રોજ અજાણ્યા શખ્સ સામે ભગવાનના આભુષણો અને રૂપીયા 5 હજાર રોકડા મળી કુલ રૂપીયા 1.30 લાખની ચોરી કરી લઈ ગયાની ફરિયાદ નોંધાવી છે. આ અંગે વધુ તપાસ ઈન્ચાર્જ પીઆઈ એ.કે.વાઘેલા ચલાવી રહ્યા છે. બીજી તરફ પાટડી શહેરના 4 રસ્તેથી ખારાઘોડા રોડ તરફ બાવળીયાળી સીંધાઈ માતાજીનું મંદિર આવેલુ છે. તા. 5-9ના રોજ રાતથી તા. 6ની સવાર સુધીમાં કોઈ શખ્સો મંદિરની દાનપેટી તોડી તેમાંથી રોકડા રૂપીયા 5 હજારની ચોરી કરી લઈ ગયા છે. આ અંગે પાટડીના દશામાના પરા વિસ્તારમાં રહેતા જીણાભાઈ ઝીંઝુવાડીયાએ પાટડી પોલીસ મથકે અજાણ્યા શખ્સ સામે ફરિયાદ નોંધાવતા વધુ તપાસ એએસઆઈ વી.કે.જાદવ ચલાવી રહ્યા છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward