Kachchh News : ગુનેગારોના વરઘોડા કાઢતી પોલીસ કેમ શાંત થઈ ગઈ? કાળા કાચ વાળી કાર રોકતા બે પોલીસ કર્મીઓ પર હુમલો
ગુજરાતમાં ગુનેગારો બેફામ બની ગયાં છે. છાશવારે આરોપીઓના વરઘોડા કાઢતી પોલીસના જ વરઘોડા નીકળવા માંડ્યા હોય તેવી સ્થિતિ સર્જાઈ છે. આરોપીઓ સામે કાયદાનો સકંજો લઈને ફરતી પોલીસ પોતાની પર જ હુમલા થતાં શાંત થઈ ગઈ છે. પાટણમાં લુખ્ખા તત્વોના હુમલા દરમિયાન ઊભી પૂંછડિયે ભાગી ગયેલી પોલીસ સામે ગૃહ વિભાગે લાલ આંખ કરીને માત્ર સસ્પેન્ડ કરવાનું શસ્ત્ર ઉગામ્યું છે. એવામાં કચ્છના ભુજમાં પણ બે પોલીસ કર્મીઓ પર હુમલો થયો હોવાની ઘટના સામે આવી છે. બે પોલીસ કર્મીઓને ઈજા પહોંચી કચ્છના ભુજમાં માધાપર બાપા સીતારામ મઢુડી પાસે કાળા કાચ વાળી ગાડી પસાર થઈ રહી હતી. આ ગાડીને પોલીસ કર્મીઓએ રોકવા જતાં જ હુમલો કરવામાં આવ્યો હતો. આ હુમલામાં બે પોલીસ કર્મીઓને ઈજા પહોંચી હતી અને તેમને તાત્કાલિક સારવાર માટે જી.કે. જનરલ હોસ્પિટલમાં ખસેડવામાં આવ્યા હતાં. રાજ્યના નાયબ મુખ્યમંત્રીએ તાજેતરમાં જ કહ્યું હતું કે, પોલીસને પડકાર ફેંકનારાને હનુમાનજીના દર્શન કરવા પડશે. પરંતુ ખરેખર પડકાર ફેંકનારાને હનુમાનજીના દર્શન થયા જ નથી. ગુનેગારો બેફામ બન્યા છે તેમને કાયદો વ્યવસ્થા અને પોલીસનો સહેજ પણ ડર રહ્યો નથી. જેના કારણે લોકોમાં ભય ફેલાયો છે. ગુજરાતમાં પોલીસ પર વારંવાર થતા હુમલા ગુજરાતમાં તાજેતરમાં જ ભાવનગરમાં વેળાવદર ભાલ પોલીસ સ્ટેશનમાં ફરજ બજાવતા ત્રણ પોલીસ કૉન્સ્ટેબલ પર જુગારીઓ દ્વારા હીચકારો અને જીવલેણ હુમલો કરવામાં આવ્યો હતો. ત્યાર બાદ વડોદરામાં પણ એક દંપતીએ પોલીસ પર હુમલો કર્યો હોવાની ઘટના સામે આવી હતી. થોડા સમય પહેલા અંબાજી પાસેના પાડલિયામાં પોલીસ પર તીરકામઠા અને પથ્થરમારો કરીને હુમલો કરાયો હતો. ગત જાન્યુઆરીમાં અમદાવાદના નરોડામા બુટલેગરે પોલીસ પર હુમલો કર્યો હતો.શામળાજી પાસે પોલીસ પર હુમલો કરી ભાગવા જતાં ગેંગસ્ટર સુખલાલ ડાંગી પર પોલીસે ફાયરિંગ કર્યું હતું.આવી અનેક ઘટનાઓ છે જેમાં પોલીસ પર હુમલા થયાં છે. પાટણની ઘટના તાજી છે ત્યાં ભુજમાં હુમલો થયો પાટણની ઘટના પોલીસ વિભાગને શરમમાં મુકે તેવી છે. 20 લોકોના ટોળાએ હથિયારો સાથે પોલીસ પર હુમલો કર્યો હતો. આ દરમિયાન પોલીસ ત્યાંથી ઉભી પૂંછડિયે ભાગી ગઈ હતી. આ ઘટનામાં ગૃહ વિભાગ એક્શનમાં આવ્યો હતો અને એક પીએસઆઈ સહિત એએસઆઈ અને કોન્સ્ટેબલને સસ્પેન્ડ કરવાનો નિર્ણય લીધો હતો. પોલીસે આ ઘટનામાં ત્રણ લોકોને ડિટેઈન કર્યા હોવાની પણ વિગતો સામે આવી છે. હુમલો કરનારા વધુ લોકો પકડાય અને પોલીસ જાહેરમાં તેમનો વરઘોડો કાઢે ત્યાં સુધીમાં પોલીસની આબરૂના ધજાગરા ઉડી ગયા છે. હવે ભુજમાં પણ માત્ર કાળા કાચ વાળી કાર રોકવા બાબતે પોલીસ પર જીવલેણ હુમલાની ઘટના સામે આવી છે. આ પણ વાંચોઃ Ahmedabad News : ગુજરાતની ટેકનિકલ કોલેજોની ફી જાહેર થઈ, 27 કોલેજમાં 1થી 2 ટકા ફીનો વધારો થયો
Read Full Story arrow_forward
