Ranpur: રાણપુરમાં દારૂબંધીના લીરેલીરા, પોલીસ દંડૂકો ઉગામતી નથી.!
બોટાદ જિલ્લાના રાણપુરમાં પોલીસ સ્ટેશનથી લઈને તાલુકા પંચાયત કચેરી સુધીના રોડ પર દારુડિયા તત્વોનો ત્રાસ વધવા છતાંય સ્થાનિક પોલીસ દ્વારા કોઈ જ પ્રકારની કડક કાર્યવાહી કરવામાં આવી રહી નથી.રાણપુર પોલીસના આર્શિવાદ તળે નગરમાં જાણે કે દારુબંધીનો કાયદો અમલમાં જ ન હોય તેમ મુખ્ય બજારમાં આવેલી જન્મભૂમિ હાઇસ્કુલ અને મનુભાઈ શેઠ ઈંગ્લીશ મીડિયમ સ્કુલ નજીક જાહેર રસ્તા પર છેલ્લા કેટલાક સમયથી દારૂડિયાનો આતંક વધતો જોવા મળી રહ્યો છે. આ વિસ્તાર શૈક્ષણિક સંસ્થાઓ તથા વ્યસ્ત બજાર વિસ્તાર હોવાથી અહીં દિવસભર વિદ્યાર્થીઓ, વાલીઓ અને સામાન્ય રાહદારીઓની અવરજવર રહેતી હોય છે. સ્થાનિક લોકોના જણાવ્યા મુજબ, કેટલાક અસામાજિક તત્વો જાહેર રસ્તા પર જ દારૂના નશામાં બેફામ અપશબ્દો બોલતા, દંગલ મચાવતા અને આવનજાવન કરતા લોકો સાથે ઉદ્ધત વર્તન કરતા જોવા મળે છે. જેના કારણે ખાસ કરીને વિદ્યાર્થીઓ અને મહિલાઓમાં ભયનો માહોલ સર્જાયો છે. સ્થાનિક નાગરિકો દ્વારા અનેકવાર સંબંધિત તંત્ર અને પોલીસને રજૂઆત કરવામાં આવી હોવા છતાં હજુ સુધી કોઈ અસરકારક કાર્યવાહી થતી ન હોવાની ચર્ચા લોકોમાં ચાલી રહી છે. લોકોમાં એવો પણ આક્ષેપ ઉઠી રહ્યો છે કે જાણે તંત્ર ઘોર નિંદ્રામાં હોય અને કેટલીક જગ્યાએ મોટા ભરણ ચાલતા હોવાના કારણે કાર્યવાહી થતી નથી તેવી લોકમુખે ચર્ચા સાંભળવા મળી રહી છે. સ્થાનિક વેપારીઓ અને વાલીઓનું કહેવું છે કે સ્કૂલ પાસે આ પ્રકારની પરિસ્થિતિ બાળકોના ભવિષ્ય અને સલામતી માટે ચિંતાજનક છે. તેઓએ તાત્કાલિક પોલીસ પેટ્રોલિંગ વધારવા અને આવા તત્વો સામે કડક કાર્યવાહી કરવાની માંગ ઉઠાવી છે. ત્યારે હવે જોવાનું રહ્યું કે તંત્ર આ ગંભીર સમસ્યાને કેટલું ગંભીરતાથી લઈ તાત્કાલિક પગલાં ભરે છે કે નહીં. રાણપુરના નાગરિકો આશા રાખી રહ્યા છે કે વિદ્યાર્થીઓ અને સામાન્ય જનતાની સલામતી માટે તંત્ર વહેલી તકે યોગ્ય પગલાં લેશે. ગુજરાતના વધુ સમાચાર વાંચવા માટે ક્લિક કરો https://sandesh.com/maru-saher-maru-gaam
Read Full Story arrow_forward
