Palanpur: ધ સ્કુલ ઓફ સાયન્સમાં રપ1 થી વધુ છાત્રોનું સન્માન કરાયું
બનાસકાંઠા જિલ્લાના મુખ્ય મથક પાલનપુરમાં આવેલી ધ સ્કુલ ઓફ સાયન્સના વિદ્યાર્થીઓએ વિજ્ઞાન પ્રવાહમાં આ વર્ષે ભારે સફળતા પ્રાપ્ત કરી છે. નીટ ગુજરાતી માધ્યમમાં ઉત્તર ગુજરાતના પ્રથમ ત્રણ નંબર ધ સ્કુલ ઓફ સાયન્સ, પાલનપુર તથા રીનીટ ગુજરાતી અને અંગ્રેજી બંને માધ્યમમાં પ્રથમ 10 નંબર સ્કુલ ઓફ સાયન્સે મેળવેલ છે. આ વર્ષે વિજ્ઞાન પ્રવાહના રપ1 જેટલા વિદ્યાર્થીઓએ મેરીટ એમબીબીએસમાં પ્રવેશ માટે લાયક થયા છે અને તે પૈકીના 209 વિદ્યાર્થીઓએ અત્યાર સુધીમાં પ્રવેશ મેળવી લીધો છે. આમ સ્કુલ ઓફ સાયન્સની સફળતા પાછળ શાળાના આચાર્ય, શિક્ષકો તેમજ માર્ગદર્શક જે.બી.પ્રજાપતિ અને કે.પી.જોષી અને તેમની ટીમને અભિનંદન આપવામાં આવ્યા હતા. કાર્યક્રમ દરમ્યાન પ્રવીણભાઈ માળીએ જણાવ્યું હતું કે શિક્ષણએ વ્યક્તિને મંઝીલ સુધી પહોંચાડવાનું માત્ર પ્લેટફોર્મ પુરું પાડે છે પરંતુ સાચું ઘડતર વિદ્યાર્થીઓની આંતરિક પ્રકૃતિ અને સમર્પણથી થાય છે. સમય સાથે બદલાતી ટેકનોલોજી અને આર્ટિફિશિયલ ઈન્ટેલિજન્સના આ યુગમાં માત્ર ડિગ્રી મેળવવા પુરુતું ન સીમિત ન રહેતા, વિદ્યાર્થીઓએ ભવિષ્યની જરૂરીયાતો અનુસાર કૌશલ્યો વિકસાવવા પડશે. તેમણે સચિન તેન્ડુલકર અને અન્ય પ્રેરણાદાયી ઉદાહરણો આપીને વિદ્યાર્થીઓને કોઈપણ ક્ષેત્રમાં સફળ થવા માટે 100 ટકા સમર્પણ અને સખત મહેનત કરવા પ્રોત્સાહિત કર્યા હતા. આ પ્રસંગે જિલ્લા પંચાયતના પ્રમુખ વસંતભાઈ પુરોહિતે જણાવ્યું હતું કે વિદ્યાર્થીઓની આ સફળતા પાછળ તેમની પોતાની મહેનત ઉપરાંત ગુરુજનોનું માર્ગદર્શન અને માતા-પિતાનો મોટો ત્યાગ રહેલો છે. પુસ્તકીય જ્ઞાનની સાથે સાથે દર્દીઓ અને સમાજ પ્રત્યે સંવેદના હોવી એ એક સારા ડોક્ટર અને આદર્શ નાગરીક માટે અત્યંત આવશ્યક છે જેથી યુવાનોએ હંમેશા માનવીય મુલ્યોને જાળવી રાખવા જોઈએ. આ પ્રસંગે પાલનપુરના ધારાસભ્ય અનિકેતભાઈ ઠાકરે જણાવ્યું હતું કે સ્કુલ ઓફ સાયન્સ દ્વારા આપવામાં આવતું ગુણવત્તાસભર શિક્ષણ વિદ્યાર્થીઓમાં ઉજ્જવળ ભવિષ્યનું નિર્માણ કરી રહ્યું છે. શ્રદ્ધા અને આત્મવિશ્વાસના દીવા હૈયે પ્રગટાવીને વિદ્યાર્થીઓ પોતાના નિર્ધારીત માર્ગ પર આગળ વધશે તો મંઝીલ ચોક્કસ મળશે અને આ જ યુવાનો દેશના સર્વાંગી વિકાસમાં મહત્વપૂર્ણ ભુમિકા ભજવશે. કાર્યક્રમમાં વિદ્યાર્થીઓને શિલ્ડ, સન્માનપત્ર અને જે.બી.પ્રજાપતિ લિખિત કેળવણી પુસ્તકથી સન્માન કરવામાં આવ્યું હતું. આ કાર્યક્રમમાં પાલનપુર નગરપાલિકાના પ્રમુખ સુનીતાબેન પટેલ સહિત વિવિધ મહાનુભાવો, ઉપસ્થિત રહ્યા હતા.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
