Gandhinagar: કુડાસણમાં નિર્માણાધીન સાઈટ પર સ્લેબ તૂટયો, 10થી વધુ મજૂરો કાટમાળમાં દટાયા
ગાંધીનગર મહાપાલિકાના કુડાસણ ખાતે નવી બની રહેલી કોમર્શિયલ 'બોસકી ધ એમ્પાયર' નામની બાંધકામ સાઇટમાં આજે રાત્રે સવા નવ વાગ્યાની આસપાસ મોટી દુર્ઘટના સર્જાઈ હતી. ઘટનામાં લોખંડનો સ્લેબ તૂટી પડતાં તેની નીચે મજૂરો દટાતાં તેમની ચીસોથી સમગ્ર વાતાવરણ હચમચી ઊઠયું હતું.પ્રાપ્ત વિગતો મુજબ, કન્સ્ટ્રક્શન સાઇટ પર બે યુનિટ વચ્ચે લોખંડનો સ્લેબ ઊભો કરવામાં આવી રહ્યો હતો, તે દરમિયાન આ સ્લેબ અચાનક ધડાકાભેર નીચે તૂટી પડયો હતો. જેના પ્રચંડ અવાજથી આજુબાજુમાં રહેતા લોકો પણ બહાર દોડી આવ્યા હતા. આ સ્લેબ નીચે ત્યાં કામ કરી રહેલા 10થી 15 જેટલા મજૂરો દટાયા હોવાની પ્રાથમિક વિગતો સાંપડી છે.આ ઘટનાની જાણ ગાંધીનગર ફાયર બ્રિગેડને કરવામાં આવતાં ફાયરની પાંચથી વધુ ગાડીઓ તાબડતોબ સ્થળ પર દોડી આવી હતી અને યુદ્ધના ધોરણે બચાવ કામગીરી શરૂ કરી હતી. 108 એમ્બ્યુલન્સની ટીમો પણ ઘટનાસ્થળે પહોંચી ગઈ હતી. કાટમાળ હટાવીને દટાયેલા શ્રમિકોને બહાર કાઢવાનું શરૂ કરાયું છે. અત્યાર સુધીમાં કાટમાળમાંથી ઈજાગ્રસ્ત 8 મજૂરોને સારવાર અર્થે સિવિલ હોસ્પિટલ ખસેડાયા હોવાના અહેવાલ છે. આ ગંભીર દુર્ઘટનાને પગલે નાયબ મુખ્યમંત્રી હર્ષ સંઘવી પણ ત્વરિત ઘટનાસ્થળે પહોંચ્યા હતા અને રાહત-બચાવ કામગીરીની સમીક્ષા કરી હતી.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
