સરસપુર સ્વિમિંગ પૂલમાં રાત્રે અસામાજિક તત્વોએ આતંક મચાવ્યો, વીડિયો વાયરલ
સરસપુર વિસ્તારમાં આવેલા AMC સંચાલિત સ્વિમિંગ પૂલમાં રાત્રિના સમયે કેટલાક યુવકો પ્રવેશ્યા હોવાના દાવા સાથેનો વીડિયો સોશિયલ મીડિયામાં વાયરલ થયો છે. ઘટનાને પગલે સ્વિમિંગ પૂલની સુરક્ષા વ્યવસ્થા અંગે સવાલો ઊભા થયા છે. સોશિયલ મીડિયામાં વાયરલ થયેલા વીડિયોમાં 10થી 15 જેટલા યુવકો સ્વિમિંગ પૂલ પરિસરમાં પ્રવેશીને ગીતો વગાડતા અને પાણીમાં ન્હાતા જોવા મળતા હોવાના દાવા થયા છે. વીડિયોની સ્વતંત્રપુષ્ટિ થઈ નથી. ઘટનાને લઈને AMC અને પોલીસ તંત્રની સુરક્ષા વ્યવસ્થા ચર્ચામાં આવી છે.સ્થાનિક રજૂઆતો મુજબ પોટલીયા ચાર રસ્તા નજીક આવેલો AMC સંચાલિત સ્વિમિંગપૂલ રાત્રે નિયમ મુજબ બંધ રહે છે. તેમ છતાં કેટલાક લોકો મોડીરાત્રે પરિસરમાં પ્રવેશતા હોવાના આક્ષેપો અગાઉ પણ કરવામાં આવ્યા છે. સ્થાનિકોનો દાવો છે કે આવી ઘટનાઓ એકથી વધુ વખત બની ચૂકી છે. સ્થાનિક સ્તરે વારંવાર સુરક્ષા અંગે રજૂઆતો કરવામાં આવી હોવાનો દાવો કરવામાં આવ્યો છે. સાથે જ સ્વિમિંગ પૂલ પરિસરમાં CCTV કેમેરાની સુવિધા ન હોવાના મુદ્દે પણ સવાલો ઉઠી રહ્યા છે. ડેપ્યુટી કમિશનર નિલેશ પટેલે જણાવ્યું હતું કે ઘટનાની જાણ તંત્રને થઈ છે અને પોલીસ ફરિયાદ નોંધવાની પ્રક્રિયા હાથ ધરવામાં આવી રહી છે. તેમના જણાવ્યા મુજબ અગાઉ સુરક્ષા માટે બાઉન્સરની વ્યવસ્થા પણ કરવામાં આવી હતી. ઘટનાની માહિતી મળતા પોલીસ સ્થળે પહોંચી હતી, જોકે તે પહેલાં સંકળાયેલા લોકો ત્યાંથી નીકળી ગયા હોવાનું તેમણે જણાવ્યું. તંત્ર દ્વારા સુરક્ષા વ્યવસ્થાની સમીક્ષા શરૂ કરવામાં આવી છે. જરૂર જણાશે તો સ્વિમિંગ પૂલની પરિસર દિવાલ વધુ ઊંચી કરવાની સહિતના પગલાં અંગે વિચારણા કરવામાં આવશે. ઘટનાને લઈને સ્થાનિક રહીશોમાં પ્રતિક્રિયા નોંધાઈ રહી છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward