Navsari News: હાઇટેક ઓઇલ ચોરીનો પર્દાફાશ, 86 લાખથી વધુના મુદ્દામાલ સાથે 5 ઝડપાયા
નવસારી નેશનલ હાઈવે નંબર 48 પરથી પસાર થતા કિંમતી કન્ટેનરો અને ટેન્કરોમાંથી માલસામાન ચોરી કરતી ગેંગનો નવસારી પોલીસે પર્દાફાશ કર્યો છે. નવસારી લોકલ ક્રાઇમ બ્રાન્ચ અને ચીખલી પોલીસે સંયુક્ત ઓપરેશન હાથ ધરીને આલીપોર નજીક હાઇવે પર ચાલતા મસમોટા ક્રૂડ ઓઇલ અને ડામર ચોરીના કૌભાંડને ઝડપી પાડ્યું છે. પોલીસે ઘટના સ્થળેથી લાખો રૂપિયાના મુદ્દામાલ સાથે પાંચ આરોપીઓની ધરપકડ કરી છે.કંપનીના કરોડોના ઓઇલ પર મારતા હતા તરાપ ઘટનાની મળતી માહિતી અનુસાર, મુંબઈની પ્રખ્યાત 'હિન્દુસ્તાન ઓઈલ એક્સપ્લોરેશન કંપની'માંથી ક્રૂડ ઓઇલ અને ડામરનો મોટો જથ્થો ટેન્કરો મારફતે ભાવનગર તરફ લઈ જવામાં આવી રહ્યો હતો. આ દરમિયાન નેશનલ હાઈવે પર સક્રિય ઓઇલ ચોરી કરતી ગેંગના સાગરીતો ટેન્કર ચાલકો સાથે મેળાપીપણું કરતા હતા. ડ્રાઇવરોને પૈસાની લાલચ આપીને હાઇવે પર હોટેલ કે અવાવરૂ જગ્યાએ ટેન્કરો ઊભા રખાતા હતા અને તેમાંથી કિંમતી જથ્થો સરકાવી લેવાતો હતો. ચોરીનું ગણિત: રૂ. 30માં ક્રૂડ ઓઇલ અને રૂ. 60માં ડામર! પોલીસ તપાસમાં સામે આવ્યું છે કે, મુખ્ય સૂત્રધારો ટેન્કર ચાલકોને આ લૂંટના માલમાં સામેલ કરવા માટે ડામરના પ્રતિ લીટર રૂપિયા 60 અને ક્રૂડ ઓઇલના પ્રતિ લીટર રૂપિયા 30 ચૂકવતા હતા. પોલીસે બાતમીના આધારે આલીપોર પાસે રેડ કરવામાં આવી ત્યારે બે ટેન્કરોમાંથી અંદાજે 200 લીટર જેટલો ક્રૂડ ઓઇલ અને ડામરનો જથ્થો ચોરી કરાઈ રહ્યો હતો, જે રંગેહાથ ઝડપાઈ ગયો હતો. મુખ્ય સૂત્રધારો સહિત 5 જેલભેગા, સુરત-વાંસદાના ખરીદદારો વોન્ટેડ પોલીસે આ રેડ દરમિયાન ઓઇલ ચોરીના મુખ્ય સૂત્રધાર પ્રકાશ ખટીક અને જસવીર ભવરીયા સહિત ત્રણ ટેન્કર ચાલકો મળી કુલ 5 આરોપીઓની ધરપકડ કરી લીધા છે. પોલીસે ઘટના સ્થળેથી બે મોટા ટેન્કરો, ચોરીનો જથ્થો અને અન્ય સાધનો મળીને કુલ રૂપિયા 86.30 લાખનો મુદ્દામાલ કબજે કર્યો છે. પોલીસની આગામી કાર્યવાહી આ ચોરીનું નેટવર્ક ક્યાં સુધી ફેલાયેલું છે, તેની તપાસ કરતા જાણવા મળ્યું છે કે, ચોરીનું આ ગેરકાયદેસર ઓઇલ ખરીદવામાં સુરતનો અંકિત પટેલ અને વાંસદાનો વિનોદ ડાગલિયા સામેલ છે. પોલીસે આ બંને ખરીદદારોને વોન્ટેડ જાહેર કર્યા છે અને તેમને ઝડપી પાડવા માટે અલગ-અલગ ટીમો બનાવીને ચક્રો ગતિમાન કર્યા છે. આ પણ વાંચો - Navsari News: વાહનચોર મિકેનિકની ધરપકડ, 9 બાઈક જપ્ત
Read Full Story arrow_forward