Amreli News: ધારી ખોડિયાર ડેમ પાસે ઘૂનામાં નાહવા પડેલા 28 વર્ષીય યુવાનનું ડૂબી જતાં કરુણ મોત
અમરેલી જિલ્લાના ધારી પંથકમાંથી પ્રવાસન અને ધાર્મિક સ્થળે સર્જાયેલી એક અત્યંત દૂખદ ઘટના સામે આવી છે. ધારી પાસે આવેલા પ્રખ્યાત ખોડિયાર ડેમ નજીકના ઘૂનામાં નાહવા પડેલો 28 વર્ષનો એક આશાસ્પદ યુવાન અચાનક ઊંડા પાણીમાં ગરકાવ થઈ ગયો હતો. પાણીના પ્રવાહ અને ઊંડાણનો અંદાજ ન આવવાને કારણે યુવાન ડૂબવા લાગ્યો હતો, જેને બચાવવા માટે સ્થાનિક સ્તરે બૂમાબૂમ થઈ ગઈ હતી. ધારી પોલીસે શરૂ કરી કાયદેસરની તપાસ મૃતક યુવાનની ઓળખ હરપાલભાઇ શિવકુભાઈ ખાચર (ઉંમર વર્ષ 28) તરીકે થઈ છે અને તે બોટાદનો રહેવાસી હોવાનું સામે આવ્યું છે. હરપાલભાઈ ધારી ખોડિયાર ડેમ ખાતે દર્શનાર્થે અથવા ફરવા માટે આવ્યા હતા. તે દરમિયાન ડેમ પાસે આવેલા જાણીતા ઘૂનાના પાણીમાં તેઓ નાહવા માટે પડ્યા હતા. નાહતી વખતે અચાનક પગ લપસતાં કે ઊંડા પાણીમાં ખેંચાઈ જતાં તેઓ ડૂબી ગયા હતા. આ અકસ્માતની જાણ વાયુવેગે પ્રસરતાં જ ખોડિયાર ડેમ ખાતે સ્થાનિક લોકો અને મુલાકાતીઓના મોટી સંખ્યામાં ટોળેટોળા ઉમટી પડ્યા હતા. પોલીસે ઘટનાસ્થળે પહોંચી મૃતદેહ પીએમ અર્થે ખસેડ્યો માહિતી મળતાં જ ધારી પોલીસ સ્ટેશનનો કાફલો અને 108 એમ્બ્યુલન્સની ટીમ ઘટનાસ્થળે દોડી આવી હતી. સ્થાનિક તરવૈયાઓની મદદથી યુવાન હરપાલભાઈના મૃતદેહને પાણીમાંથી બહાર કાઢવામાં આવ્યો હતો. પોલીસે 108 મારફતે મૃતક યુવાનની ડેડ બોડીને પોસ્ટમોર્ટમ (PM) ની વિધિ માટે ધારી સિવિલ હોસ્પિટલ ખાતે ખસેડી છે. પોલીસે આ મામલે અકસ્માત મોતનો ગુનો નોંધી બોટાદ ખાતે રહેતા યુવાનના પરિવારજનોને કાળજા કંપાવનારા સમાચાર આપવા સહિતની આગળની કાયદેસરની કાર્યવાહી હાથ ધરી છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward