Surat: તાપી નદીમાં જળકુંભીનું સામ્રાજ્ય, લાખોના ખર્ચ પછી પણ પરિણામ શૂન્ય
સુરત મહાનગરપાલિકા (SMC) દ્વારા સ્માર્ટ સિટીના દાવાઓ વચ્ચે શહેરની ઓળખ સમાન તાપી નદીની જે દયનીય સ્થિતિ પ્રવર્તી રહી છે, તેનાથી સુરતવાસીઓમાં ભારે રોષ જોવા મળી રહ્યો છે. તાપી નદીમાં પલસાણા અને કતારગામથી લઈને છેક રાંદેર સુધીના વિસ્તારોમાં મોટા પાયે જળકુંભી (લીલી વનસ્પતિ) ની ચાદર પથરાઈ ગઈ છે. આ જળકુંભીના કારણે નદીનું પાણી રીતસરનું દૂષિત અને કાળું પડી રહ્યું છે, જે પાણી સીધું જ ફિલ્ટર પ્લાન્ટ્સમાં જઈને લોકોના ઘરો સુધી પહોંચે છે. પરિણામે, શહેરમાં પીવાના પાણીની ગુણવત્તા બગડી છે અને મનપાના વોટર સપ્લાય વિભાગ સામે સવાલો ઉભા થયા છે.દર વર્ષે લાખોનો ધુમાડો, પરિણામ શૂન્યચોંકાવનારી બાબત એ છે કે, સુરત મનપા દ્વારા દર વર્ષે પ્રિ-મોન્સૂન કામગીરી અને નદી શુદ્ધિકરણના નામે હાઇડ્રોલિક ક્રેન અને મશીનરી પાછળ લાખો-કરોડો રૂપિયાના ટેન્ડરો બહાર પાડવામાં આવે છે. અગાઉ પણ વિરોધ પક્ષ અને સ્થાનિક પર્યાવરણવાદીઓ દ્વારા આ કામગીરીમાં થતા ભ્રષ્ટાચાર અંગે અવાજ ઉઠાવવામાં આવ્યો હતો. પરંતુ, દર વર્ષની જેમ આ વર્ષે પણ એજન્સીઓ અને અધિકારીઓની જુગલબંદીને કારણે કામગીરી માત્ર કાગળ પર જ સમેટાઈ ગઈ હોય તેમ સ્પષ્ટ દેખાઈ આવે છે. લાખો રૂપિયા ચૂકવાઈ ગયા પછી પણ નદીમાંથી જળકુંભીનો એક મોટો ભાગ હજી સુધી સાફ કરી શકાયો નથી.આગામી ચોમાસામાં પૂર લાવશે આ જળકુંભી?પર્યાવરણના નિષ્ણાતોના મતે, જળકુંભી નદીના ઓક્સિજનના સ્તરને તો ઘટાડે જ છે, પરંતુ તેની સાથે તેના મૂળ એટલા મજબૂત હોય છે કે તે નદીના કુદરતી વહેણને અવરોધે છે. જૂન મહિનામાં જો ઉપરવાસમાંથી તાપી નદીમાં ઉકાઈ ડેમ દ્વારા પાણી છોડવામાં આવે, તો આ જળકુંભીના લીધે પાણીનો નિકાલ ઝડપથી થઈ શકશે નહીં. પરિણામે, લો-લાઇંગ એરિયા (નીચાણવાળા વિસ્તારો) માં પૂરના પાણી ફરી વળવાની પૂરેપૂરી શક્યતા છે. સુરતના જાગૃત નાગરિકો માગ કરી રહ્યા છે કે ચોમાસું સત્તાવાર બેસે તે પહેલા જ યુદ્ધના ધોરણે આખી નદી સાફ કરવામાં આવે, જેથી કોઈ મોટી જાનમાલની હોનારત અટકાવી શકાય.આ પણ વાંચો: Vadodara: ગત પૂરની આપત્તિમાંથી પણ તંત્ર ન શીખ્યું, ચોમાસા પહેલા ઠેર-ઠેર ખોદકામથી જનતા ત્રાહિમામ
Read Full Story arrow_forward
