અમદાવાદ એરપોર્ટ પરથી 6.5 કરોડના હાઈબ્રિડ ગાંજા સાથે મુસાફરની ધરપકડ
અમદાવાદ : અમદાવાદ એરપોર્ટ પર કસ્ટમ વિભાગના એર ઇન્ટેલિજન્સ યુનિટની ચકાસણીમાં થાઇ એરવેઝની ફ્લાઇટ TG-343 મારફ્તે બેંગકોકથી અમદાવાદ આવેલા મુસાફર પાસેથી અંદાજે 6.5 કરોડ રૂપિયાની બજાર કિંમત ધરાવતો કુલ 6.540 કિલોગ્રામ હાઈબ્રિડ ગાંજો મળી આવ્યો હતો. ગાંજા સાથે ઝડપાયેલો નદીમ નામનો મુસાફર છત્તીસગઢ રાજ્યના રાયપુરનો રહેવાસી હોવાનું અને તેની આ પ્રથમ વિદેશ યાત્રા હોવાનું જાણવા મળે છે. તે દિલ્હીથી બેંગકોક ગયો હતો અને ત્યાંથી ગાંજો છુપાવીને અમદાવાદ લાવી રહ્યો હોવાની બાતમી અગાઉથી મળી હતી.અમદાવાદ એરપોર્ટ પર કન્વેયર બેલ્ટ પર ફ્રતી તેની ટ્રોલી બેગ પર અધિકારીઓની નજર ગઈ હતી. જોકે, પેસેન્જર લાંબા સમય સુધી પોતાની બેગ લેવા આગળ આવ્યો નહોતો. સૂત્રોના જણાવ્યા મુજબ, ટ્રોલી બેગની બંને બાજુ 'ક્રોસ' નું નિશાન લગાવવામાં આવ્યું હતું. આ નિશાન એ દર્શાવતું હતું કે બેગનું કન્વેયર બેલ્ટની બહાર મૂકાયેલા એક્સ્ટ્રા સ્ક્રીનિંગ મશીનમાં ચેકિંગ કરવામાં આવ્યું હતું અને તે શંકાસ્પદ લાગી હતી. સામાન્ય રીતે આવા નિશાનનો અર્થ પેસેન્જરને ખબર હોતી નથી અને મુસાફરને પણ તેની જાણ નહોતી. કસ્ટમ અધિકારીઓએ શરૂઆતમાં પેસેન્જરને બહાર જવા દેવાની તક આપી હતી, જેથી તેની હરકતો પર નજર રાખી શકાય. આખરે મુસાફર ટ્રોલી બેગ લઈ એરપોર્ટ બહાર નીકળવાનો પ્રયાસ કર્યો ત્યારે અધિકારીઓએ તેને અટકાવી તપાસ હાથ ધરી હતી. તપાસ દરમિયાન ટ્રોલી બેગની અંદર બ્લેક કલરના પ્લાસ્ટિકમાં વેક્યૂમ પેકિંગ કરેલા બોક્સ મળી આવ્યા હતા. બોક્સ ખોલતા તેમાં લીલા રંગનો સૂકવેલો છોડ જેવા પદાર્થ મળી આવ્યો હતો. પ્રાથમિક ટેસ્ટમાં આ પદાર્થ હાઈબ્રિડ મેરિજુઆના (કેનાબિસ) હોવાનું સામે આવ્યું હતું. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
