Gandhinagar News: મધુર ડેરીના રૂ. 128 કરોડના આધુનિક પ્લાન્ટનું આવતીકાલે અમિત શાહના હસ્તે ઉદ્ઘાટન
ગાંધીનગર અને તેની આસપાસના પશુપાલકો તેમજ ગ્રાહકો માટે એક મોટા અને આનંદના સમાચાર સામે આવ્યા છે. ગાંધીનગરની પ્રખ્યાત 'મધુર ડેરી' ના બીજા એક અત્યંત આધુનિક અને વિશાળ પ્લાન્ટનું આવતીકાલે ભવ્ય ઉદ્ઘાટન થવા જઈ રહ્યું છે. આ નવો પ્લાન્ટ અંદાજે રૂપિયા 128 કરોડના માતબર ખર્ચે તૈયાર કરવામાં આવ્યો છે, જે શરૂઆતમાં પ્રતિદિન 2.5 લાખ (અઢી લાખ) લીટર દૂધ પ્રોસેસિંગની પ્રચંડ ક્ષમતા ધરાવે છે. હાલ ગાંધીનગર શહેરમાં કાર્યરત જૂનો પ્લાન્ટ 2 લાખ લીટરની ક્ષમતા ધરાવે છે, જેની સરખામણીએ આ નવો પ્લાન્ટ ઘણો મોટો અને હાઈટેક છે.કેન્દ્રીય ગૃહમંત્રી લોકાર્પણ બાદ પ્લાન્ટનું નિરીક્ષણ કરશે આ હાઈટેક મિલ્ક પ્રોસેસિંગ પ્લાન્ટનું ઉદ્ઘાટન કેન્દ્રીય ગૃહ મંત્રી અમિત શાહના હસ્તે કરવામાં આવશે. પોતાના ગુજરાત પ્રવાસ દરમિયાન ગૃહમંત્રી ખાસ આ કાર્યક્રમમાં ઉપસ્થિત રહેશે અને રિબન કાપીને પ્લાન્ટને ખુલ્લો મૂકશે. લોકાર્પણ વિધિ પૂર્ણ કર્યા બાદ કેન્દ્રીય મંત્રી અમિત શાહ ડેરીના સત્તાધીશો અને ટેકનિકલ નિષ્ણાતો સાથે આ આધુનિક પ્લાન્ટની કાર્યપ્રણાલી સમજવા માટે તેનું વિસ્તૃત નિરીક્ષણ પણ કરવાના છે. આ પ્રસંગે સહકારિતા ક્ષેત્રના અગ્રણીઓ અને સ્થાનિક નેતાઓ પણ હાજર રહેશે. દૂધ, દહીં અને આઈસક્રીમનું થશે ઉત્પાદન આ નવા પ્લાન્ટની સૌથી મોટી ટેકનિકલ વિશેષતા એ છે કે તેને ભવિષ્યની જરૂરિયાતોને ધ્યાનમાં રાખીને ડિઝાઇન કરવામાં આવ્યો છે. આગામી સમયમાં જો દૂધની આવક વધશે, તો કોઈ મોટા ફેરફાર વગર આ પ્લાન્ટની ક્ષમતાને અઢી લાખ લીટરથી વધારીને સીધી 5 લાખ લીટર સુધી એક્સપાન્ડ (વિસ્તરણ) કરી શકાશે. આ આધુનિક પ્રોસેસિંગ યુનિટ શરૂ થવાથી હવે મધુર બ્રાન્ડ હેઠળ દૂધ ઉપરાંત છાસ, પનીર, ઘી, દહીં, વિવિધ પ્રકારની મીઠાઈઓ અને આઈસક્રીમનું મોટા પાયે ગુણવત્તાયુક્ત ઉત્પાદન શરૂ કરવામાં આવશે, જેનો સીધો લાભ ગ્રાહકો અને પશુપાલકોને મળશે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
