Tharad: ભરડવામાં તળાવમાં માછલીના ટપોટપ મોત બાદ આરોગ્ય તંત્ર દોડતું થયું
વાવ થરાદ જિલ્લાના સુઈગામ તાલુકાના ભરડવા ગામના તળાવમાં મોટી સંખ્યામાં માછલીઓ મૃત હાલતમાં મળી આવતા સ્થાનિક સ્તરે ચિંતાનું મોજું ફરી વળ્યું હતું. આ ઘટનાની ગંભીરતાને ધ્યાને લેતા વહીવટી તંત્ર તાત્કાલિક હરકતમાં આવ્યું છે અને તળાવની સફાઇ તેમજ રોગચાળો ન ફેલાય તે માટેના સઘન પગલાં હાથ ધર્યા છે. ભરડવા ગામે તળાવની અંદર ટપોટપ માછલી મરણ પામતા સમગ્ર ગામમાં ફફડાટ ફેલાયો હતો. તેમજ મૃત માછલીઓને લઈને અતિ દુર્ગંધ આવતી હોવાનો અહેવાલ પ્રસિદ્ધ થતા જ સંબંધિત આરોગ્ય વિભાગના અધિકારીઓ અને કર્મચારીઓનો કાફ્લો ભરડવા ગામે પહોંચ્યો હતો. ગ્રામ પંચાયત અને વહીવટી તંત્રના સંકલન દ્વારા તળાવમાં મૃત્યુ પામેલી માછલીઓનો જમીનમાં દાટી યોગ્ય રીતે નિકાલ કરવામાં આવ્યો છે. કોહવાયેલી માછલીઓના કારણે ઉભી થતી દુર્ગંધ અને સંભવિત જીવાણુઓના ફેલાવાને રોકવા માટે તળાવના કિનારે તેમજ અસરગ્રસ્ત વિસ્તારોમાં જંતુનાશક દવાઓનો છંટકાવ કરવામાં આવ્યો છે. તળાવના પાણીમાં કોઈગંભીર ચેપ ન લાગે અને ગ્રામજનોના આરોગ્ય પર તેની વિપરીત અસર ન પડે તે માટે તંત્ર દ્વારા પાવડર અને પ્રવાહી જંતુનાશકોનો ઉપયોગ કરવામાં આવ્યો છે. વહીવટી તંત્ર દ્વારા ગ્રામજનોને પણ તળાવના વિસ્તારમાં સાવચેતી રાખવા અપીલ કરવામાં આવી છે. તંત્રની આ ત્વરિત અને સકારાત્મક કામગીરીને પગલે ગ્રામજનોએ રાહતનો શ્વાસ લીધો છે. માછલીઓના સામુહિક મૃત્યુ પાછળના કારણ અતિશય પડી રહેલી ગરમી હોવાનું અનુમાન લગાવાઈ રહ્યું છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
