Junagadh News: વિલિંગ્ડન ડેમની કૂંડીમાં ન્હાવા પડેલા ત્રણ પરપ્રાંતિય યુવાનો ડૂબ્યા, એકનો મૃતદેહ મળ્યો
જૂનાગઢના પ્રખ્યાત પ્રવાસન સ્થળ એવા વિલિંગ્ડન ડેમમાં આજે એક કરૂણ ઘટના સામે આવી છે. ડેમની કૂંડીમાં ન્હાવા પડેલા ત્રણ પરપ્રાંતિય યુવાનો ડૂબી જતાં અરેરાટી વ્યાપી ગઈ છે. પ્રતિબંધ હોવા છતાં ન્હાવા પડેલા યુવાનો કાળનો કોળિયો બનતા પરિવારમાં માતમ છવાયો છે.7 મિત્રો આવ્યા હતા ન્હાવા, 3ના શ્વાસ અદ્ધર થયા ઘટનાની મળતી માહિતી અનુસાર, કુલ 7 મિત્રોનું ટોળું વિલિંગ્ડન ડેમ ખાતે ફરવા અને સ્નાન કરવા માટે આવ્યું હતું. ડેમ વિસ્તારમાં ન્હાવાની સખત મનાઈ હોવા છતાં, આ યુવાનો કૂંડીમાં ન્હાવા માટે ઉતર્યા હતા. સ્નાન કરતી વખતે અચાનક ઉંડા પાણીમાં ગરકાવ થઈ જવાથી ત્રણ યુવાનો ડૂબવા લાગ્યા હતા. મિત્રોને ડૂબતા જોઈ અન્ય સાથીઓએ બૂમાબૂમ કરતા સ્થાનિક લોકો અને પોલીસ ઘટનાસ્થળે દોડી આવ્યા હતા. રેસ્ક્યુ ઓપરેશનમાં એક મૃતદેહ મળ્યો ઘટનાની જાણ થતા જ જૂનાગઢ ફાયર વિભાગની ટીમ અને પોલીસ કાફલો તાત્કાલિક સ્થળ પર પહોંચી ગયો હતો. ફાયર વિભાગના તરવૈયાઓએ ડેમની કૂંડીમાં સઘન શોધખોળ હાથ ધરી હતી. કલાકોની જહેમત બાદ એક યુવાનનો મૃતદેહ મળી આવ્યો છે, જેને પંચનામું કરી પીએમ માટે સિવિલ હોસ્પિટલ ખસેડવામાં આવ્યો છે. અન્ય બેની શોધખોળ અને પરિવારમાં શોક હજુ પણ અન્ય બે યુવાનો લાપતા છે, જેમને શોધવા માટે ફાયર બ્રિગેડ દ્વારા રેસ્ક્યુ ઓપરેશન ચલાવવામાં આવી રહ્યું છે. પોલીસ દ્વારા મૃતક યુવાનના પરિવારજનોને જાણ કરવામાં આવી છે. ઉલ્લેખનીય છે કે, વહીવટી તંત્ર દ્વારા વારંવાર સૂચના આપવા છતાં જોખમી રીતે ન્હાવા પડતા લોકો પોતાની જિંદગી ગુમાવી રહ્યા છે. આ પણ વાંચો - Junagadh News: DYSP ઓફિસ પાસે SOGનો સપાટો, 5 કિલો ગાંજા સાથે શખ્સ ઝડપાયો
Read Full Story arrow_forward
