Surat News: ઓલપાડના જીણોદમાં રાજ્યપાલે ‘એક પેડ મા કે નામ’ હેઠળ કર્યું વૃક્ષારોપણ, પર્યાવરણ જાળવણીનો આપ્યો સંદેશ
ગુજરાતના રાજ્યપાલ આચાર્ય દેવવર્ત આજે સુરતના ઓલપાડના પ્રવાસે હતા, જ્યાં તેમની અનોખી સાદગી જોવા મળી હતી. રાજ્યપાલ કોઈ લક્ઝરી કાર કે પ્રોટોકોલના મોટા કાફલાને બદલે અડાજણ ડેપોથી સામાન્ય મુસાફરોની જેમ સરકારી એસટી બસમાં બેસીને ઓલપાડના જીણોદ ગામ પહોંચ્યા હતા. જીણોદ ગામમાં રાજ્યપાલનું વહીવટી તંત્ર દ્વારા ભવ્ય સ્વાગત કરવામાં આવ્યું હતું અને પોલીસ દ્વારા તેમને 'ગાર્ડ ઓફ ઓનર' આપી સન્માનિત કરવામાં આવ્યા હતા. રાજ્યપાલે ગ્રામજનો સાથે આત્મીયતાથી મુલાકાત કરી હતી અને તેમના ઉષ્માભર્યા સ્વાગત બદલ આભાર વ્યક્ત કર્યો હતો.‘એક પેડ મા કે નામ’ અભિયાન હેઠળ વૃક્ષારોપણ જીણોદ ગામની મુલાકાત દરમિયાન રાજ્યપાલ આચાર્ય દેવવર્તે પર્યાવરણ જાળવણીનો સંદેશ આપ્યો હતો. તેમણે ગામની સીમમાં પહોંચીને પ્રધાનમંત્રીના આહવાન હેઠળ ચાલી રહેલા ‘એક પેડ મા કે નામ’ અભિયાન અંતર્ગત વૃક્ષારોપણ કર્યું હતું. આ પ્રસંગે તેમણે ગ્રામજનોને સંબોધતા જણાવ્યું હતું કે, પર્યાવરણનું જતન કરવું એ આપણા સૌની નૈતિક જવાબદારી છે અને દરેક નાગરિકે પોતાની માતાની સ્મૃતિમાં ઓછામાં ઓછું એક વૃક્ષ વાવી તેનું જતન કરવું જોઈએ. રાજ્યપાલની સાથે વહીવટી અધિકારીઓ અને સ્થાનિક આગેવાનો પણ આ વનીકરણ કાર્યક્રમમાં ઉત્સાહભેર જોડાયા હતા. ધારાસભ્ય મુકેશ પટેલ સાથે સફાઈ અભિયાનમાં સહભાગી થયા વૃક્ષારોપણ બાદ રાજ્યપાલે સ્વચ્છતાનો સંદેશ ફેલાવવા માટે ગામમાં સફાઈ અભિયાન હાથ ધર્યું હતું. આ અભિયાનમાં તેમની સાથે સ્થાનિક ધારાસભ્ય મુકેશ પટેલ પણ જોડાયા હતા. રાજ્યપાલ અને ધારાસભ્યએ સ્વયં હાથમાં સાવરણી લઈ ગામના માર્ગો પર સફાઈ કરી હતી, જે જોઈને ગ્રામજનો પણ પ્રેરાયા હતા. મુકેશ પટેલે રાજ્યપાલની આ મુલાકાતને ગૌરવપૂર્ણ ગણાવી હતી અને જીણોદ ગામમાં થઈ રહેલા વિકાસ કાર્યોની માહિતી આપી હતી. રાજ્યપાલના આ પ્રવાસથી ઓલપાડ પંથકમાં સાદગી અને પર્યાવરણ સુરક્ષાના નવા સંસ્કારોનું સિંચન થયું હોવાનું સ્થાનિકો અનુભવી રહ્યા છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
