Surendranagar: જોરાવરનગરના દંપતીને ચેક રીટર્ન કેસમાં 1 વર્ષની સજા
જોરાવરનગરમાં રહેતા દંપતીએ પોતાની શાંતા શોપ ફેકટરીમાં ધંધાની જરૂરીયાત માટે વર્ષ 2025માં નીવૃત બેંકર પાસેથી 4.50 લાખ ઉછીના લીધા હતા. જેમાં દંપતીએ આપેલા અલગ-અલગ ચેક રીટર્ન થતા કોર્ટમાં કેસ કરાયા હતા. આ બન્ને કેસ ચાલી જતા કોર્ટે દંપતીને દોષીત ઠેરવી 1 વર્ષની સજાનો હુકમ કર્યો છે. જોરાવરનગરની સવા હોસ્પીટલ પાસે રહેતા રણછોડભાઈ ખેર નીવૃત બેંક કર્મી છે. જોરાવરનગરના દેરાસર સામે શાંતા શોપ ફેકટરી ચલાવતા દંપતી અમીબેન હાર્દીકભાઈ વોરા અને હાર્દીક જીતેન્દ્રભાઈ વોરા સાથે તેઓને વર્ષોથી પારીવારીક સબંધો છે. એપ્રીલ-2025માં ધંધાના કામ અર્થે જરૂરીયાત ઉભી થતા અમીબેન વોરાએ રણછોડભાઈ પાસે 2.50 લાખ 4 માસ માટે ઉછીના લીધા હતા. જયારે જુન-2025માં હાર્દીક વોરાએ રૂપીયા 2 લાખ 2 માસ માટે રણછોડભાઈ પાસેથી ઉછીના લીધા હતા. જેના બદલામાં તા. 28-8-25ના રોજ અમીબેને 2.50 લાખનો અને હાર્દીક વોરાએ રૂપીયા 2 લાખનો ચેક આપ્યો હતો. આ બન્ને ચેક અપુરતા ભંડોળના લીધે પરત ફરતા રણછોડભાઈએ વકીલ જી.ડી.ઝાલા મારફત તા. 22-9-25ના રોજ સુરેન્દ્રનગરની એડીશનલ ચીફ જયુડીશીયલ મેજીસ્ટ્રેટની કોર્ટમાં કેસ કર્યો હતો. આ બન્ને કેસ તાજેતરમાં ચાલી જતા ફરિયાદીના વકિલની દલીલો, મૌખીક અને દસ્તાવેજી પુરાવાના આધારે જજ કે.એમ.આહીરે દંપતીને કસુરવાર ઠેરવ્યા હતા. જેમાં દંપતીને 1 વર્ષની સજા અને ચેકની રકમ 60 દિવસમાં ફરિયાદીને ચુકવવા હુકમ કર્યો છે. જો તેઓ આ રકમ ન ચુકવે તો વધુ 3 માસની સજા પણ સંભળાવાઈ છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
