Sayla: સાયલામાં અક્સ્માત ઝોન બન્યો ઓવરબ્રિજ
પ્રતિ દિન હજારો વાહનોની અવરજવરથી ધમધમતા સાયલા હાઇવે પરના ઓવરબ્રિજ ઉપર ચોવીસ કલાકમાં અલગ અલગ ત્રણ અકસ્માતમાં ત્રણ વ્યક્તિઓ ઇજાગ્રસ્ત થયા હતા. ટાયર પંચર થવાને કારણે કે તાંત્રિક ખામીને કારણે રોડ પર થોભાવેલા વાહનો પાછળ ત્રણ વાહન ભટકાતા અકસ્માતોની હારમાળા સર્જાઈ હતી.સોમવારે સવારે સર્જાયેલા અકસ્માતમાં ઓવરબ્રિજ પર ઉભેલા બંધ ટ્રક પાછળ ટેન્કર ધડાકાભેર અથડાતા ગમખ્વાર અકસ્માત સર્જાયો હતો જેમાં ટેન્કરના કેબિનનો ખુરદો બોલી જવા સાથે ચાલકને ઇજાઓ થવા પામી હતી.મધરાત બાદ સર્જાયેલા અન્ય એક અકસ્માતમાં ઓવરબ્રિજ મધ્યે ટાયર પંચર થયેલ તરબૂચ ભરેલી પીકઅપ કાર પાછળ પૂરપાટ ધસી આવેલ એક ટ્રેલર ટ્રક અથડાતા રોડ પર તરબૂચ વેરણ છેરણ પડયા હતા. પીકઅપ કાર માં ટાયર બદલાવી રહેલ ચાલક,ક્લીનર અક્સ્માત સમયે સમય સૂચકતા વાપરી દૂર હટી જતા બન્નેનો આબાદ બચાવ થયો હતો.મંગળવારે સવારના સમયે સર્જાયેલા ત્રીજા અક્સ્માત માં ઓવરબ્રિજ પર બંધ ઊભેલા આયશર ટ્રક પાછળ એક બાઇક અથડાતા સર્જાયેલા અકસ્માતમાં બાઇક ચાલક તથા પત્નીને નાની મોટી ઇજાઓ થતા તુરંત સારવાર અર્થે હોસ્પિટલમાં ખસેડવામાં આવ્યા હતા જ્યારે સાથે રહેલ બાળકનો આબાદ બચાવ થતા રામ રાખે એને કોણ ચાખે એ કહેવત યથાર્થ થતી જોવા મળી હતી. ત્રણે અક્સ્માત બાદ ટ્રાફ્કિ જામ ના દ્રશ્યો સર્જાતા સાયલા પોલીસ દ્વારા ત્યાં પહોંચી અકસ્માતગ્રસ્ત વાહનો ત્યાંથી હટાવી વાહન વ્યવહાર પૂર્વવ્રત કરાવવામાં આવ્યો હતો. ઓવરબ્રિજ પર અવાર નવાર સર્જાતા ગોઝારા અકસ્માતોમાં અનેક જિંદગીઓ પ્રાણ ગુમાવી ચૂકયું છે ત્યારે સાયલા હાઈવે પરના ઓવરબ્રિજ પર રાતના સમયે પ્રકાશ માટે બન્ને બાજુ લગાવેલ લાઈટો શોભાના ગાંઠિયા સમાન બની હોય તેમ લગભગ બધી જ લાઈટો લાંબા સમય થી બંધ હાલતમાં હોવાની અનેક રજૂઆતો છતાં નિંભર તંત્ર આ બાબતે કેમ બેદરકારી દાખવી રહ્યું છે તેવો સવાલ લોકો કરી રહ્યા છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
