Vadodara પંથકમાં વાતાવરણનો મિજાજ બદલાયો: ડેસરના અનેક ગામોમાં મેઘરાજાની તોફાની બેટિંગ
હવામાન વિભાગની આગાહીના પગલે વડોદરા જિલ્લાના ડેસર તાલુકામાં આજે કુદરતનો પ્રકોપ જોવા મળ્યો છે. ભયંકર વાવાઝોડા અને તેજ પવન સાથે ખાબકેલા કમોસમી વરસાદે સમગ્ર પંથકમાં ભારે તારાજી સર્જી છે. ડેસર સહિત તાલુકાના અનેક ગામોમાં વૃક્ષો ધરાશાયી થવા અને મકાનોના છાપરા ઉડવાની ઘટનાઓ સામે આવતા જનજીવન અસ્તવ્યસ્ત થઈ ગયું છે.ગામડાઓમાં પાયમાલી અને પશુનું મોત ડેસર તાલુકાના ઈટવાડ, વાંટા, વર્ણોલી, વાલાવાવ, વેજપુર, પ્રતાપપુરા, સિહોરા, વરસડા અને જાંબુગોલ સહિતના ગામોમાં કુદરતી આફત ત્રાટકી છે. ડેસર APMC ગ્રાઉન્ડમાં લીમડાના ઘટાદાર વૃક્ષો ધરાશાયી થતા તેની નીચે દબાઈ જવાથી અનેક વાહનોને ભારે નુકસાન પહોંચ્યું છે. દુખદ રીતે, એપીએમસીની દીવાલ ધરાશાયી થતા એક ભેંસ તેની નીચે દબાઈ ગઈ હતી અને તેનું કરુણ મોત નીપજ્યું હતું. વાલાવાવ ચોકડી ખાતે અનેક દુકાનોના પતરા હવામાં ઉડ્યા હોવાના અહેવાલો પણ પ્રાપ્ત થયા છે. ખેતીના પાકને મોટું નુકસાન, ખેડૂતો ચિંતાતુર આ કમોસમી માવઠાએ ખેડૂતોની કમર તોડી નાખી છે. APMC માં રાખવામાં આવેલી તમાકુની સંખ્યાબંધ ગુણો વરસાદી પાણીમાં પલળી ગઈ છે, જેનાથી વેપારીઓ અને ખેડૂતોને લાખોનું નુકસાન થયું છે. ખેતરોમાં ઉભા પાક એવા તમાકુ, બાજરી અને શાકભાજીને વ્યાપક નુકસાનની ભીતિ સેવાઈ રહી છે. ખેડૂતોના જીવ અત્યારે તાળવે ચોંટ્યા છે અને હજુ પણ ગ્રામ્ય વિસ્તારોમાંથી વધુ નુકસાનના સમાચાર મળી રહ્યા છે. વહીવટી તંત્ર દ્વારા નુકસાનીનો અંદાજ મેળવવાની તજવીજ હાથ ધરવામાં આવી છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
