Kutchના કંડલા સ્પેશિયલ ઇકોનોમિક ઝોનમાં લાગી ભયાનક આગ, ફાયર ફાઈટરો ઘટનાસ્થળે
કચ્છ જિલ્લાના આર્થિક હબ ગણાતા કંડલા સ્પેશિયલ ઇકોનોમિક ઝોન (KASEZ) માં આજે એક મોટી આગની ઘટના સામે આવી છે. અહીં આવેલી એક પ્રતિષ્ઠિત ગારમેન્ટ કંપનીના યુનિટમાં અચાનક આગ ભભૂકી ઉઠતા અફરાતફરીનો માહોલ સર્જાયો હતો. કાપડ અને અન્ય જ્વલનશીલ સામગ્રી હોવાને કારણે આગે જોતજોતામાં રૌદ્ર સ્વરૂપ ધારણ કરી લીધું હતું, જેના કારણે આકાશમાં કાળા ધુમાડાના ગોટા જોવા મળ્યા હતા.ગારમેન્ટ કંપનીમાં આગ ભભૂકી ઉઠી આગ લાગવાની જાણ થતા જ કંડલા સ્પેશિયલ ઇકોનોમિક ઝોનની પોતાની ફાયર ટીમ અને ગાંધીધામ નગરપાલિકાની બે ફાયર બ્રિગેડની ટીમો તાત્કાલિક ઘટનાસ્થળે પહોંચી ગઈ હતી. ફાયર ફાઈટરો દ્વારા આગને વધુ ફેલાતી અટકાવવા માટે ચારેબાજુથી પાણીનો મારો ચલાવવામાં આવી રહ્યો છે. પ્રાથમિક માહિતી મુજબ, જે સમયે આગ લાગી ત્યારે કંપનીમાં કામદારો હાજર હતા, પરંતુ સમયસૂચકતા વાપરી તમામને સુરક્ષિત બહાર કાઢી લેવામાં આવ્યા હોવાથી કોઈ જાનહાનિના અહેવાલ નથી.ફાયરે આગને કાબુમાં લેવા પ્રયાસો કર્યા ગારમેન્ટ કંપની હોવાથી અંદર રહેલા કાપડનો મોટો જથ્થો, મશીનરી અને તૈયાર કપડાં બળીને ખાખ થઈ ગયા હોવાની આશંકા છે, જેનાથી કંપનીને લાખો રૂપિયાનું નુકસાન થવાનો અંદાજ છે. આગ લાગવાનું પ્રાથમિક કારણ શોર્ટ સર્કિટ હોવાનું મનાઈ રહ્યું છે, જોકે આગ સંપૂર્ણપણે કાબુમાં આવ્યા બાદ જ સત્તાવાર કારણ જાણી શકાશે. હાલમાં ફાયર વિભાગની ટીમ કુલિંગની પ્રક્રિયા અને આગને સંપૂર્ણ ઠારવા માટેના પ્રયાસો કરી રહી છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
