Navsari News: ગેસ સિલિન્ડર મામલે હોટલ એસોસિએશને કરી રજૂઆત
નવસારી જિલ્લામાં કમર્શિયલ ગેસ સિલિન્ડરનો પુરવઠો ખોરવાતા હોટલ અને રેસ્ટોરન્ટ સંચાલકો મુશ્કેલીમાં મુકાયા છે. આ સમસ્યાના ઉકેલ માટે નવસારી જિલ્લા હોટલ એસોસિએશન દ્વારા જિલ્લા કલેક્ટરને આવેદનપત્ર પાઠવી તાત્કાલિક ગેસ પુરવઠો શરૂ કરાવવા માગ કરવામાં આવી છે. એસોસિએશને ચેતવણી આપી છે કે, જો જલ્દી ઉકેલ નહીં આવે તો હજારો લોકોએ રોજગારી ગુમાવવાનો વારો આવશે.હોટલ ઉદ્યોગ બંધ થવાની કગાર પર છેલ્લા કેટલાક સમયથી કમર્શિયલ ગેસ સિલિન્ડરનો પુરવઠો અનિયમિત અથવા બંધ થઈ જતાં હોટલ ઉદ્યોગની હાલત કફોડી બની છે. રાંધણ ગેસ વિના હોટલ અને રેસ્ટોરન્ટ ચલાવવી અશક્ય બની ગઈ છે. એસોસિએશનના જણાવ્યા અનુસાર, જો આ પરિસ્થિતિ લાંબો સમય ચાલશે તો નવસારીના અનેક નાના-મોટા હોટલ એકમોને તાળા મારવાની નોબત આવશે. 25 હજાર પરિવારો પર બેરોજગારીનું જોખમ નવસારી શહેરમાં હોટલ ઉદ્યોગ સાથે પ્રત્યક્ષ અને પરોક્ષ રીતે 25,000થી વધુ લોકો જોડાયેલા છે. વેઈટર, કુક, સફાઈ કામદારોથી લઈને સપ્લાયર્સ સુધીના હજારો પરિવારોનું ગુજરાન આ વ્યવસાય પર નિર્ભર છે. હોટલો બંધ થવાથી આ તમામ લોકો બેરોજગાર થવાની ભીતિ સેવાઈ રહી છે, જે જિલ્લાના અર્થતંત્ર માટે મોટો ફટકો સાબિત થઈ શકે છે. કલેક્ટર પાસે તાત્કાલિક હસ્તક્ષેપની માગ હોટલ એસોસિએશનના હોદ્દેદારોએ કલેક્ટરને રજૂઆત કરતા જણાવ્યું હતું કે, કમર્શિયલ ગેસનો જથ્થો પૂરતા પ્રમાણમાં મળી રહે તેવી વ્યવસ્થા ગોઠવવી અત્યંત જરૂરી છે. નવસારી જિલ્લા વહીવટી તંત્ર આ બાબતે ગેસ કંપનીઓ સાથે સંકલન સાધીને ઉકેલ લાવે તેવી ઉગ્ર માગ કરવામાં આવી છે. આવેદનપત્ર આપતી વખતે મોટી સંખ્યામાં હોટલ સંચાલકો હાજર રહ્યા હતા. આ પણ વાંચો - Navsari News : નવસારીની પ્રાથમિક શાળામાં રાજ્યપાલ આચાર્ય દેવવ્રતજીએ વહેલી સવારે વિદ્યાર્થીઓ સાથે કર્યા યોગ અને પ્રાણાયામ
Read Full Story arrow_forward
