ચોટીલા, સાયલા અને થાનગઢ તાલુકાના સર્વાંગી વિકાસ અર્થે વિસ્તૃત ચર્ચા કરાઈ
છેવાડાના માનવી સુધી કલ્યાણકારી યોજનાઓના લાભ પહોંચાડવા એ સરકારની પ્રાથમિકતાસાયલા મામલતદાર કચેરી ખાતે રાજ્યકક્ષાના શહેરી વિકાસ મંત્રી અને સુરેન્દ્રનગર જિલ્લાના પ્રભારી મંત્રી દર્શનાબેન વાઘેલાની અધ્યક્ષતામાં સમીક્ષા બેઠક યોજાઈ હતી. બેઠકમાં જિલ્લાના વિકાસશીલ તાલુકાઓ એવા ચોટીલા, સાયલા અને થાનગઢના આગામી બે વર્ષના આયોજન અંગે વિગતવાર ચર્ચા કરવા સાથે વિવિધ વિભાગોને ફળવવામાં આવતી ગ્રાન્ટ, પ્રગતિ હેઠળના કામો અને ભાવિ લક્ષ્યાંકોની ઝીણવટભરી સમીક્ષા કરી જરૂરી માર્ગદર્શન પૂરું પડાયું હતું. બેઠક દરમિયાન પ્રભારી મંત્રીએ સ્પષ્ટ કર્યું હતું કે, છેવાડાના માનવી સુધી સરકારની કલ્યાણકારી યોજનાઓના લાભો પહોંચે અને માળખાગત સુવિધાઓ સુદ્રઢ બને તે સરકારની પ્રાથમિકતા છે. તેમણે શિક્ષણ, આરોગ્ય, આંગણવાડી, પશુપાલન, પીવાનું પાણી અને રસ્તાઓ જેવા પાયાના પ્રશ્નોને અગ્રતા આપી આગામી બે વર્ષનું સચોટ આયોજન કરવા અધિકારીઓને સૂચના આપી હતી.ખાસ કરીને દીકરીઓના શિક્ષણ અને સુવિધા પર વિશેષ ભાર મૂકતા જણાવ્યું હતું કે, તમામ શાળાઓમાં દીકરીઓ માટે અલગ શૌચાલય અને પાણીની પૂરતી વ્યવસ્થા સુનિશ્ચિત કરવી અનિવાર્ય છે. આરોગ્ય ક્ષેત્રે CHC સેન્ટરોની વહીવટી મુશ્કેલીઓ દૂર કરવા અને આંગણવાડીઓ માટે સરકારી જમીન સંપાદિત કરી નવા મકાનો બનાવવા માટે ગ્રાન્ટ ફળવવાની ખાતરી આપી હતી. આ ઉપરાંત, ગ્રામ્ય બહેનો પશુપાલન થકી આર્થિક રીતે સધ્ધર બને તે માટે વધુમાં વધુ બહેનોને આ વ્યવસાય સાથે જોડવા સૂચવ્યું હતું. સમીક્ષા બેઠકમાં ધારાસભ્ય કિરીટસિંહ રાણા, શામજીભાઈ ચૌહાણ, કલેક્ટર કે.એસ. યાજ્ઞિક, જિલ્લા આયોજન અધિકારી સહિત વિવિધ વિભાગના ઉચ્ચ અધિકારીઓ અને કર્મચારીઓની ઉપસ્થિતિમાં સાયલા તાલુકાને વિકસિત તાલુકો બનાવવાના નિર્ધાર સાથે નાણાંકીય વર્ષ 2025-26 માટે રૂ. 2 કરોડ અને વર્ષ 2026-27 માટે રૂ. 2.50 કરોડ માતબર ગ્રાન્ટનું આયોજન કરવામાં આવ્યું છે. ત્યારે વિકાસકાર્યોની ગુણવત્તા અને સમયમર્યાદા બાબતે ગુણવત્તા સાથે કોઈ બાંધછોડ ચલાવી લેવામાં આવશે નહીંની ઉપસ્થિત સરકારી બાબુઓને ખાસ તાકીદ કરી આગામી છ મહિનામાં ફ્રીથી રિવ્યુ બેઠક યોજી કામગીરીની પ્રગતિ પોતે તપાસશેનું કહી એક તકે બેદરકાર બાબુઓ સામે નિયમાનુસાર કાર્યવાહી કરવાની ચીમકી પણ આપી હતી. ગુજરાતના વધુ સમાચાર વાંચવા માટે ક્લિક કરો https://sandesh.com/maru-saher-maru-gaam
Read Full Story arrow_forward
