બદરખા ગામમાં ખેતરમાં ગેરકાયદે વીજ પોલી ઊભો કરી પાકને નુકસાન કરાયું
ધોળકા તાલુકાના સરોડા સીમ વિસ્તારમાં એક ખેડૂતની ખેતીની જમીનમાં પૂર્વ મંજૂરી વિના વીજ પોલ તથા ટ્રાન્સફેર્મર ઊભા કરવામાં આવ્યા હોવાના આક્ષેપોથી ખળભળાટ મચ્યો છે. ધોળકા તાલુકાના બદરખા ગામના ખેડૂત પટેલ રાકેશભાઈ બચુભાઈએ ધોળકા મામલતદાર અને નાયબ કાર્યપાલક ઇજનેર UGVCL ધોળકા ગ્રામ્ય ને લેખિત અરજી કરી ગંભીર આક્ષેપ કર્યો છે કે તેમની સરોડા સીમમાં આવેલી સર્વે નં. 375ની ખેતી જમીનમાં પૂછપરછ કર્યા વગર ગેરકાયદેસર રીતે વીજ પોલ અને ટ્રાન્સફેર્મર ઉભા કરી દેવાતા ઉભા ઘઉંના પાકને મોટા પ્રમાણમાં નુકસાન થયું છે. ખેડૂતના જણાવ્યા મુજબ સ્થળ પર હાજર કર્મચારીઓએ જણાવ્યું કે કામ કોન્ટ્રાક્ટરના આદેશથી થયું છે અને કોઈ કાર્યવાહી શક્ય નથી. ખેડૂતે વધુમાં આરોપ મૂક્યો કે કેટલાક સ્થાનિક લોકો દ્વારા પણ ધમકીભર્યો વર્તન કરવામાં આવ્યો હતો. ઘટના બાદ 112 પર કોલ કરી પોલીસને જાણ કરવામાં આવી હતી અને ત્યારબાદ ગ્રામ્ય પોલીસ સ્ટેશનમાં અરજી આપવામાં આવી છે. ખેડૂત પાસે સમગ્ર ઘટનાની વિડિયોગ્રાફી હોવાનો દાવો પણ કરવામાં આવ્યો છે. આ મામલે UGVCL વિરુદ્ધ ગંભીર બેદરકારીના આક્ષેપો ઉઠયા છે. ખેડૂતે પાકના નુકસાનનું તાત્કાલિક પંચનામું કરી વળતર ચૂકવવા તથા ગેરકાયદેસર ઉભા કરાયેલા વીજ પોલ દૂર કરવા માંગણી કરી છે. ખેડૂત દ્વારા ચેતવણી આપવામાં આવી છે કે જો સમયસર ન્યાય નહીં મળે તો ગાંધીજીના માર્ગે આંદોલન કરવામાં આવશે. હવે જોવાનું રહ્યું કે તંત્ર આ ગંભીર મામલે શું પગલાં લે છે.ગુજરાતના વધુ સમાચાર વાંચવા માટે ક્લિક કરો https://sandesh.com/maru-saher-maru-gaam
Read Full Story arrow_forward
