Gir Somnath News: ઓવરટેક કરવા જતાં ટ્રક નીચે ચગદાઈ ગયો બાઈકચાલક, ઘટના સ્થળે જ મોત
ગીર સોમનાથ જિલ્લાના ઉના તાલુકામાં એક હૃદયદ્રાવક અકસ્માતની ઘટના સામે આવી છે. તડ અને પાલડી ગામ વચ્ચે ટ્રકને ઓવરટેક કરતા સમયે બાઈકચાલક ટ્રકના પાછળના ટાયર નીચે આવી ગયો હતો. જે કારણે યુવકનું ઘટના સ્થળે જ કમકમાટીભર્યું મોત નીપજ્યું હતું. આ અકસ્માત એટલો ભયાનક હતો કે, યુવકના મૃતદેહના ટુકડા થઈ ગયા હતા.ઘર તરફ જઈ રહેલા યુવકનો કાળ ભેટ્યો ઘટનાની મળતી માહિતી અનુસાર, પાલડી ગામના રહેવાસી 40 વર્ષીય ભરતભાઈ રૂપાભાઈ બાબરીયા પોતાની બાઈક લઈને વાંસોજ તરફથી પોતાના ઘર પાલડી જઈ રહ્યા હતા. આ દરમિયાન માર્ગ પર જઈ રહેલી એક ટ્રકને ઓવરટેક કરવાનો પ્રયાસ કરતાં તેઓએ બાઈક પરનો કાબૂ ગુમાવ્યો હતો અને સીધા ટ્રકના પાછળના તોતિંગ ટાયર નીચે આવી ગયા હતા. અકસ્માત બાદ ઘટના સ્થળે લોકોના ટોળેટોળાં ઉમટી પડ્યા હતા. રોડ કોન્ટ્રાક્ટરની બેદરકારી પર ઉઠ્યા સવાલ સ્થાનિકોના જણાવ્યા અનુસાર, વાંસોજ થી કોબ સુધીનો રોડ અત્યારે નિર્માણ હેઠળ છે. આરોપ છે કે, રોડની કામગીરી દરમિયાન કોન્ટ્રાક્ટર દ્વારા કોઈ પણ પ્રકારનું ડાઈવર્ઝન આપવામાં આવ્યું નથી કે રોડની બાજુમાં સલામતી માટેના 'સેફ્ટી બોર્ડ' પણ લગાવવામાં આવ્યા નથી. સુરક્ષાના સાધનોના અભાવે આ માર્ગ પર અકસ્માતનું જોખમ સતત તોળાઈ રહ્યું હતું, જેનો ભોગ આજે આ યુવાન બન્યો છે. ચાર બાળકોએ પિતાની છત્રછાયા ગુમાવી મૃતક ભરતભાઈ પોતાના પરિવારના મોભી હતા. તેમના અવસાનથી ત્રણ દીકરીઓ અને એક દીકરાએ પિતાની છત્રછાયા ગુમાવી છે. હસતા-રમતા પરિવાર પર આભ તૂટી પડતા પાલડી ગામમાં શોકની કાલિમા છવાઈ ગઈ છે. પોલીસે આ મામલે ગુનો નોંધી વધુ તપાસ હાથ ધરી છે અને રોડની કામગીરીમાં રહેલી ક્ષતિઓ અંગે પણ રોષ જોવા મળી રહ્યો છે. આ પણ વાંચો - Gir Somnath: વારસાઈ જમીનનો વિવાદ હત્યામાં પલટાયો, ગંભીર રીતે દાઝેલા વૃદ્ધાનું સારવાર દરમિયાન મોત
Read Full Story arrow_forward
