Surendranagar : પ્રથુગઢની સરકારી શાળા ગામના જ છાત્રોથી ભરચક
ધ્રાંગધ્રાના પ્રથુગઢની સરકારી શાળાના સ્ટાફ અને ગ્રામજનોના અનોખા સંકલનના કારણે શિક્ષણનું સ્તર ખુબ ઉંચુ જતુ હોવાથી ગામના 100% બાળકો ગામની જ શાળામાં અભ્યાસ કરે છે અને શાળા,શિક્ષકો,આચાર્યને અલગ અલગ 6 એવોર્ડ પણ મળ્યા છે ત્યારે શાળાની કામગીરી વાતાવરણ જોઇ પુર્વ મંત્રીએ અન્ય સરકારી શાળાના સ્ટાફને પ્રથુગઢની શાળાની મુલાકાત લેવા અપીલ કરી હતી.ગામડાની સ્કૂલમાં પુરતા શિક્ષકો ન હોય,નિયમીત શિક્ષણ ન અપાતુ હોય પુરતી સુવિધા ના હોય એવુ માનીને મોટાભાગના ગામડામાંથી અનેક વિધ્યાર્થીઓ નજીકની ખાનગી શાળામાં અભ્યાસ કરતા હોય છે ત્યારે ધ્રાંગધ્રાના પ્રથુગઢની સરકારી શાળાના આચાર્ય,શિક્ષકોની અનોખી મહેનત અને ગ્રામજનોની મદદથી ગામના 100 % બાળકો ગામની જ સરકારી પ્રા.શાળામાં અભ્યાસ કરી રહયા છે. આચાર્ય કાનાણી ચંપકભાઇ, સરપંચ લકુમ બીપીનભાઇ, શિક્ષણવિદ ડી. કે. કણઝરીયા અને એસએમસી અધ્યક્ષ ભરતભાઇ ખટાણા સહિત ગ્રામજનોની મદદથી પ્રા.શાળાનો આકર્ષક પ્રવેશદ્વાર, મધ્યાહન ભોજન શેડ, પ્રાર્થના હોલ, બગીચો બનાવી સ્કૂલને રીસોર્ટ જેવી બનાવી દીધી છે. શાળાના બાળકોને સ્કૂલમાં જ વિજ્ઞાનમેળો, રમતોત્સવ, રંગોત્સવ, સ્વચ્છતા અભિયાન સહિતની શિક્ષણ સાથે વિવિધ પ્રવૃતીઓ પણ કરાવાય છે. કોમન એન્ટરન્સની પરીક્ષામાં પાંચ વર્ષથી પ્રથુગઢ શાળાના વિધ્યાર્થીઓ સૌથી વધારે પાસ થાય છે. સ્કૂલમાં 25 કોમ્પ્યુટર, લેપટોપના માધ્યમથી અત્યારથી જ બાળકોને ટેકનોલોજી સાથે જોડવાનો પ્રયાસ કરાઇ રહયો છે. આમ સુવિધાથી સજ્જ,હરીયાળી વાતાવરણ વાળી રીસોર્ટ જેવી શિક્ષણમાં પણ ઉંચ સ્તર ધરાવતી શાળાની પુર્વ મંત્રી આઇ.કે.જાડેજાએ મુલાકાત લીધા બાદ અન્ય સરકારી શાળાઓના સ્ટાફને પણ પ્રથુગઢ શાળાની મુલાકાત લેવા અપીલ કરી હતી.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
