Community News & Updates

Stay informed with the latest happenings, achievements, and announcements from our community.

All News

calendar_today September 12, 2026

Gandhinagar મનપા ચૂંટણી અંગે સૌથી મોટા સમાચાર, 14 અથવા 15 સપ્ટેમ્બરે થઈ શકે છે મોટી જાહેરાત!

ગાંધીનગર મહાનગરપાલિકા (GMC) ની ચૂંટણીને લઈને રાજ્યના રાજકીય વર્તુળોમાં અતિ મહત્વના સમાચાર સામે આવ્યા છે. મળતી વિગતો અનુસાર, મનપા ચૂંટણીનો સત્તાવાર કાર્યક્રમ આગામી 14 અથવા 15 સપ્ટેમ્બરના રોજ જાહેર કરવામાં આવી શકે છે. આ જાહેરાતની શક્યતાઓને પગલે ગાંધીનગર શહેરમાં રાજકીય ગરમાવો અત્યારથી જ ચરમસીમાએ પહોંચી ગયો છે અને તમામ રાજકીય પક્ષોએ પોતાની ચૂંટણી લક્ષી તૈયારીઓને આખરી ઓપ આપવાનું શરૂ કરી દીધું છે.14 સપ્ટેમ્બરે આખરી મતદારયાદી અને 11 ઓક્ટોબરે મતદાનની શક્યતાચૂંટણી પ્રક્રિયાના ભાગરૂપે આગામી 14મી સપ્ટેમ્બરે ફાઇનલ મતદારયાદીની સત્તાવાર પ્રસિદ્ધિ કરવામાં આવશે. મતદારયાદી જાહેર થયા બાદ સંભવિત 11મી ઓક્ટોબરે મતદાન યોજવામાં આવે તેવી પ્રબળ શક્યતાઓ સેવાઈ રહી છે. આખરી મતદારયાદી બહાર પડતાં જ કયા વોર્ડમાં કેટલા નવા ઉમેદવારો ઉમેરાયા છે અને કયા સમીકરણો બદલાશે તેનું સંપૂર્ણ ચિત્ર સ્પષ્ટ થઈ જશે. 20-25 દિવસમાં ચૂંટણી પ્રક્રિયા પૂર્ણ કરવાની તૈયારીચૂંટણી પંચ દ્વારા આ વખતે ગાંધીનગર મનપાની સમગ્ર ચૂંટણી પ્રક્રિયા અત્યંત ઝડપી અને ટૂંકા સમયગાળામાં પૂર્ણ કરવાનું આયોજન કરાઈ રહ્યું છે. અંદાજે 20 થી 25 દિવસની મુદતમાં જ સમગ્ર ચૂંટણી આટોપી લેવામાં આવશે. તારીખોની જાહેરાત થતાંની સાથે જ પાટનગરમાં ચૂંટણી આચારસંહિતા પણ અમલી બની જશે. વહીવટી તંત્ર દ્વારા શાંતિપૂર્ણ અને પારદર્શી રીતે મતદાન પ્રક્રિયા સંપન્ન થાય તે માટેની પૂર્વતૈયારીઓ તેજ કરી દેવામાં આવી છે.આ પણ વાંચો : Gandhinagar માટે ઐતિહાસિક દિવસ, એક જ દિવસમાં રૂ.1848 કરોડના વિકાસકામોનું ખાતમુહૂર્ત અને લોકાર્પણ!

Read Full Story arrow_forward

calendar_today September 12, 2026

Delhi થી ચીન જવું હવે સહેલું...!6 વર્ષ બાદ ફરી ગુઆંગઝૂ-દિલ્હીની ફ્લાઇટ સેવા શરૂ

ભારત અને ચીન વચ્ચે હવાઈ સંપર્ક પુનઃસ્થાપિત કરવાની પ્રક્રિયાને મોટો વેગ મળ્યો છે. બ્રિક્સ (BRICS) સમિટ માટે ચીનના રાષ્ટ્રપતિ શી જિનપિંગની ભારત મુલાકાત દરમિયાન 'ચાઇના સદર્ન એરલાઇન્સે' 21 સપ્ટેમ્બરથી ગુઆંગઝૂ અને નવી દિલ્હી વચ્ચે નિયમિત સીધી ફ્લાઇટ સેવા ફરી શરૂ કરવાની જાહેરાત કરી છે. લગભગ છ વર્ષ બાદ ફરી શરૂ થતી આ સેવાને બંને દેશો વચ્ચે મુસાફરી, વેપાર અને લોકો વચ્ચેના સંબંધોને પ્રોત્સાહન આપવાની દિશામાં એક મહત્વપૂર્ણ પગલું માનવામાં આવે છે. તાજેતરના મહિનાઓમાં ભારત અને ચીન વચ્ચે અન્ય ઘણા હવાઈ માર્ગો પણ ફરી શરૂ કરવામાં આવ્યા છે.21 સપ્ટેમ્બરથી સીધી સેવા શરૂ થશે'ચાઇના સદર્ન એરલાઇન્સે' શનિવારે જાહેરાત કરી હતી કે તે 21 સપ્ટેમ્બરથી ગુઆંગઝૂ-નવી દિલ્હી રૂટ પર નિયમિત પેસેન્જર ફ્લાઇટ સેવા ફરી શરૂ કરશે. એરલાઇનના જણાવ્યા અનુસાર, છ વર્ષના અંતરાલ બાદ ભારતમાં તેની સેવાઓનું આ પુનરાગમન છે. સેવા ફરી શરૂ થયા પછી એરલાઇન દક્ષિણ એશિયામાં તેના આઠ રાઉન્ડ-ટ્રિપ રૂટ પર સાપ્તાહિક 100થી વધુ ફ્લાઇટ્સનું સંચાલન કરશે. આ પગલાને ભારત અને ચીન વચ્ચે વધતા સંપર્ક અને વિસ્તૃત મુસાફરી સુવિધાઓના સંદર્ભમાં જોવામાં આવી રહ્યું છે. હવાઈ સંપર્ક વધારવાનો નિર્ણય આર્થિક, વ્યાપારી અને પ્રવાસન સંબંધોને નવી ગતિ આપી શકે છે.બ્રિક્સ સમિટ દરમિયાન લેવાયેલો નિર્ણયઆ જાહેરાત બ્રિક્સ સમિટ માટે ચીનના રાષ્ટ્રપતિ શી જિનપિંગના નવી દિલ્હી આગમન સાથે સુસંગત છે. સમિટ દરમિયાન તેમની અને વડાપ્રધાન નરેન્દ્ર મોદી વચ્ચે દ્વિપક્ષીય બેઠક પણ યોજાવાની છે.ધીમે ધીમે ફ્લાઇટ્સ ફરી શરૂ થઈ રહી છેમળતી માહિતી અનુસાર, 'એર ચાઇના'એ એપ્રિલમાં બેઇજિંગ અને નવી દિલ્હી વચ્ચે સીધી ફ્લાઇટ સેવા ફરી શરૂ કરી હતી. તે પહેલાં 'ચાઇના ઇસ્ટર્ન એરલાઇન્સે' કુનમિંગ અને કોલકાતા વચ્ચે સીધી ફ્લાઇટ્સ ફરી શરૂ કરી હતી. 30 માર્ચે 'ઇન્ડિગો' (IndiGo) એ કોલકાતા અને શાંઘાઈ વચ્ચે તેની પ્રથમ દૈનિક નોન-સ્ટોપ સેવા શરૂ કરી હતી. આ ઉપરાંત કોલકાતા અને ગુઆંગઝૂ તેમજ દિલ્હી અને ચીનને જોડતી ફ્લાઇટ સેવાઓનો પણ વિસ્તાર કરવામાં આવ્યો છે.સંબંધો સુધરવાના સંકેતોભારતના વિદેશ મંત્રાલયે ભારત અને ચીન વચ્ચે સીધી ફ્લાઇટ્સ ફરી શરૂ થવાની પુષ્ટિ કરી છે. મર્યાદિત સંપર્કના લાંબા સમયગાળા બાદ, બંને દેશો વચ્ચે મુસાફરી અને વ્યાપારી પ્રવૃત્તિઓમાં ધીમે ધીમે વધારો જોવા મળી રહ્યો છે. હવાઈ સંપર્ક પુનઃસ્થાપિત થવાથી વિદ્યાર્થીઓ, વેપારીઓ અને પ્રવાસીઓ એમ સૌને સીધો લાભ થવાની અપેક્ષા છે. BRICS ફોરમમાં 'ગ્લોબલ સાઉથ' પર ધ્યાનદરમિયાન, BRICS સમિટમાં ભાગ લેવા માટે આવેલા રાષ્ટ્રપતિ શી જિનપિંગ 'ગ્લોબલ સાઉથ'ના દેશો વચ્ચે સહયોગને પ્રોત્સાહન આપવા, આર્થિક ભાગીદારી મજબૂત કરવા અને બહુપક્ષીય સંસ્થાઓમાં વિકાસશીલ દેશોની ભૂમિકા વધારવાના ઉદ્દેશ્ય સાથેના પ્રસ્તાવો રજૂ કરે તેવી અપેક્ષા છે.આ પણ વાંચો: BRICS Summit Delhi: દિલ્હીમાં આજે દિગ્ગજોનો જમાવડો, ભારતનો દેખાશે દમ, જાણો આજે શું શું થશે ?

Read Full Story arrow_forward

calendar_today September 12, 2026

Brics Summit 2026: ચીનમાં શી જિનપિંગ પછી કોની ચાલે છે? BRICSમાં સાથે આવ્યો આ પાવરફુલ નેતા!

ચીનના રાષ્ટ્રપતિ શી જિનપિંગ ભારત આવી રહ્યા છે. તેઓ 12-13 સપ્ટેમ્બર દરમિયાન નવી દિલ્હીમાં યોજાનારી 18મી બ્રિક્સ (BRICS) સમિટમાં ભાગ લેશે. શીની સાથે 67 સભ્યોનું ચીની પ્રતિનિધિમંડળ આવ્યું છે, જેમાં ચીનના વિદેશ મંત્રી વાંગ યી અને કોમ્યુનિસ્ટ પાર્ટીના અત્યંત પ્રભાવશાળી નેતા કાઈ ચીનો સમાવેશ થાય છે.70 વર્ષીય કાઈ ચીને શી જિનપિંગના 'રાઈટ-હેન્ડ મેન' (સૌથી વિશ્વાસુ સહયોગી) માનવામાં આવે છે. તેઓ ચીનની સાત સભ્યોની પોલિટબ્યુરો સ્ટેન્ડિંગ કમિટીમાં પાંચમા ક્રમે આવે છે . આ સમિતિ દેશના સૌથી મહત્વપૂર્ણ રાજકીય નિર્ણયો લેવા માટે જવાબદાર છે.કાઇ ચીની કોણ છે ? કાઈ ચી કોમ્યુનિસ્ટ પાર્ટીના સચિવાલયના પણ ઉચ્ચ ક્રમના સભ્ય છે. આ ઉપરાંત તેઓ CPC સેન્ટ્રલ કમિટીની જનરલ ઓફિસના ડાયરેક્ટર તરીકે સેવા આપે છે. આ પાર્ટીની સૌથી મહત્વપૂર્ણ વહીવટી અને સંકલન કચેરીઓમાંની એક છે, જે ટોચના નેતાઓના કાર્યક્રમો, આવશ્યક દસ્તાવેજો અને મુખ્ય આંતરિક સંદેશાવ્યવહાર જેવા કાર્યોનું સંચાલન કરે છે. આ પદ કાઈ ચીને શી જિનપિંગ સુધી સીધી પહોંચ પ્રદાન કરે છે, તેથી જ તેમને શીના 'રાઈટ-હેન્ડ મેન' તરીકે ઓળખવામાં આવે છે.25મી SCO સમિટ 31 ઓગસ્ટથી 1 સપ્ટેમ્બર, 2025 દરમિયાન ચીનના તિયાનજિન શહેરમાં યોજાઈ હતી. કાઈએ 31 ઓગસ્ટે વડાપ્રધાન નરેન્દ્ર મોદી સાથે મુલાકાત કરી હતી.શીના વાસ્તવિક ચીફ ઓફ સ્ટાફસમાચાર એજન્સી રોઇટર્સે કાઈ ચીનું વર્ણન શી જિનપિંગના 'વાસ્તવિક' (de facto) ચીફ ઓફ સ્ટાફ તરીકે કર્યું છે. તેઓ શીની સૌથી નજીકના નેતાઓમાંથી એક છે અને વારંવાર તેમની સાથે વિદેશ પ્રવાસો અને મુખ્ય રાજદ્વારી કાર્યક્રમોમાં જોડાય છે. કાઈ ચી અને શી જિનપિંગ વચ્ચે લાંબા સમયથી રાજકીય સંબંધ છે; તેમની કારકિર્દી ફુજિયન અને ઝેજિયાંગ પ્રાંતોમાં એકસાથે રહી હતી.જોકે કાઈ ચીનો વર્તમાન પ્રભાવ માત્ર શી સાથેની તેમની જૂની મિત્રતાને કારણે જ નહીં, પરંતુ કોમ્યુનિસ્ટ પાર્ટીમાં તેઓ સંભાળતા ઉચ્ચ હોદ્દાઓને કારણે પણ છે. જૂન 2026માં, કાઈ ચીની નિમણૂક CPC સેન્ટ્રલ પાર્ટી સ્કૂલ અને નેશનલ એકેડેમી ઓફ ગવર્નન્સના વડા તરીકે કરવામાં આવી હતી, જેનાથી ચીની પાર્ટી અને સરકારી માળખામાં તેમની જવાબદારીઓ અને પ્રભાવમાં વધુ વધારો થયો.શી જિનપિંગ અને કાઈ ચી: ત્રણ દાયકા લાંબો સંબંધ. અહેવાલ મુજબ, કાઈ ચી અને શી જિનપિંગ વચ્ચેનો રાજકીય સંબંધ લગભગ ત્રણ દાયકા જૂનો છે. વર્ષ 1996માં, જ્યારે શી (Xi) ફુજિયન પ્રાંતમાં પાર્ટીના ડેપ્યુટી સેક્રેટરી બન્યા, ત્યારે કાઈ ચી (Cai Qi) ની નિમણૂક તેમની સહાયતા માટે કરવામાં આવી હતી. ત્યારબાદ, કાઈ ચી બેઇજિંગના મેયર સહિતના અનેક મહત્વપૂર્ણ હોદ્દાઓ પર રહ્યા. 2017માં, શી જિનપિંગના નિર્દેશોનું પાલન કરતા, તેમણે બેઇજિંગમાં સ્થળાંતરિત કામદારો (migrant workers) વિરુદ્ધ એક કઠોર અભિયાનનું નેતૃત્વ કર્યું, જેના પરિણામે મોટી સંખ્યામાં લોકોને શહેરમાંથી હાંકી કાઢવામાં આવ્યા હતા.'થિંકચાઇના' (ThinkChina) અનુસાર, તેઓ 2022માં CPC સચિવાલયના પ્રથમ સચિવ અને 2023માં જનરલ ઓફિસના ડાયરેક્ટર બન્યા. પ્રોટોકોલની દ્રષ્ટિએ કાઈને સત્તાવાર રીતે "નંબર ટુ" (બીજા ક્રમના નેતા) તરીકે નિયુક્ત કરવામાં આવ્યા નથી.  તે સ્થાન પ્રીમિયર લી કિયાંગ (Li Qiang) પાસે છે. કાઈ ચીનો પ્રભાવ મુખ્યત્વે શી જિનપિંગ સાથેની તેમની નિકટતા અને એકસાથે અનેક મહત્વપૂર્ણ હોદ્દાઓ સંભાળવાને કારણે છે.કાઈ ચીની ભારત મુલાકાત શા માટે મહત્વપૂર્ણ છે?2020ના સરહદી વિવાદ બાદ ભારત અને ચીન વચ્ચેના સંબંધોમાં તણાવ રહ્યો છે. જોકે બંને દેશોએ તાજેતરમાં તણાવ ઘટાડવાનો અને સંબંધો સુધારવાનો પ્રયાસ કર્યો છે, તેમ છતાં સરહદ, વેપાર, રોકાણ અને અન્ય મુદ્દાઓ પર મતભેદો યથાવત છે. આ પૃષ્ઠભૂમિમાં શી જિનપિંગની સાથે કાઈ ચીની ભારત મુલાકાત અત્યંત મહત્વપૂર્ણ માનવામાં આવે છે.BRICS સમિટ બંને દેશોના નેતાઓ માટે સીધી વાતચીત કરવાની તક પૂરી પાડશે. શી જિનપિંગ અને વડાપ્રધાન નરેન્દ્ર મોદી વચ્ચે દ્વિપક્ષીય બેઠક થવાની પણ અપેક્ષા છે. રોઇટર્સના જણાવ્યા અનુસાર, શીની મુલાકાત ભારત-ચીન સંબંધો સુધારવાના ચાલુ રાજદ્વારી સંવાદો અને પ્રયાસોને આગળ વધારવાની તક બની શકે છે.

Read Full Story arrow_forward