Vapi: દમણમાં હવે ડુપ્લિકેટ દારૂ પીરસાતો હોવાની આશંકા : પ્રવાસીઓના આરોગ્ય સામે ખતરો
સંઘપ્રદેશ દમણમાં પણ હવે ડુપ્લીકેટ દારૂનો વેપલો ધમધોકાર ચાલી રહ્યો હોવાની ચર્ચા થઈ રહી છે. સંઘપ્રદેશ દમણમાં મોટી દમણ અને ઝરીમાં તથા કેટલાક નજીકના ગામોમાં કેટલાક અસામાજિક તત્વો દારૂના આ વેપાલમાં જોડાયા છે.સ્થાનિક સુત્રો પાસેથી મળતી વિગતો એવી છે કે, દમણ પંથકમાં ભંગારના ભાવે મળતી કાચની બ્રાન્ડેડ કંપનીની દારૂની ખાલી બોટલોને નજીવા ભાવે ખરીદી ફરીથી તેનો ઉપયોગ કરવામાં આવી રહ્યો છે. વળી, દારૂ ખરીદનારા મોટાભાગના લોકો આ બાબતથી અજાણ હોય છે. તેથી તેઓ ડુપ્લિકેટ દારૂ ખરીદી લે છે. આવા સંજોગોમાં પર્યટકોના આરોગ્ય સામે પણ ખતરો ઊભો થાય એવી શક્યત વધી છે.તાજેતરમાં ગુજરાતમાં લઠ્ઠાકાંડ સર્જાઈ ચુક્યો છે. ત્યારે દમણ પ્રશાસન દ્વારા અને એક્સાઈઝ વિભાગ દ્વારા ડુપ્લિકેટ દારૂ અંગે તપાસ કરાવાય એવી લોક માંગ ઉઠી છે. પ્રાપ્ત માહિતી મુજબ દમણ પ્રવાસન સ્થળ તરીકે ખ્યાતિ ધરાવે છે. અનેક લોકો દરરોજ પોતાના પરિવારના સભ્યો સાથે પણ અને મિત્રો સાથે અહીં ફરવા માટે આવે છે. વર્ષોથી દારૂની છૂટ હોવાને લઈને મોટાભાગના લોકો દારૂ પીવે છે. પરંતુ હવે દમણમાં પણ ધીમી ગતિએ ડુપ્લીકેટ દારૂએ પગપેસારો કરી દીધો છે. કેટલીક હોટલો અને ધાબાઓમાં આવો દારૂ ખુલ્લેઆમ વેચાઈ રહ્યો છે. પરંતુ તેની કોઈ તપાસ પણ અત્યાર સુધી કરવામાં આવી નથી. જેના કારણે ડુપ્લીકેટ દારૂ બનાવનારાઓને જલસા પડી ગયાનું ચર્ચાઈ રહ્યું છે. નોંધનીય છે કે દમણમાં અનેક મોટી રેસ્ટોરન્ટ અને હોટલોમાં દારૂઓ પીરસવામાં આવે છે. પરંતુ તેની ખાલી બોટલો ફરી ક્યાં જાય છે અને કોણ તેનો ઉપયોગ કરે છે તે અંગે તપાસ થાય તો કૌભાંડનો પર્દાફાશ પણ થઈ શકે છે. સંઘપ્રદેશ દમણમાં ડુપ્લીકેટ દારૂના વેચાણની ચર્ચા હજી પોલીસ સુધી પહોંચી નથી તે બાબત આશ્ચર્યજનક છે. તેથી સમગ્ર બાબતે દમણના એસપી દ્વારા તપાસ કરવામાં આવે તેવી તીવ્ર લોક માંગ ઉઠી છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
